Georges Delnon

Dialäkt: Baseldütsch

dr Georges Delnon (2014)

Dr Georges Delnon (*20. März 1958 z Züri) isch e Schwizer Theaterlaiter, Intendant und Reschissör.

Läbe und Wärk

Dr Georges Delnon isch 1958 z Züri uf d Wält cho und in dr Wälschschwiiz ufgwachse. Er het z Bärn Kunstgschicht, Komposition und Muusigwüsseschaft studiert. Im Johr 1985 het er mit andere zsämme z Bärn s "Atelier 20" für zitgenössischs Theater und Muusig gründet. Er het as Reschissör in dr Schwiizer Muusigtheaterszene afo schaffe und isch am Stadttheater Luzärn aagstellt gsi. Vo 1987 het er as freie Reschissör an Operehüüser z Frankriich, z Augsburg, z Karlsrueh, z Frankfurt und in andere Stedt gschafft. 1996 isch er Intendant am Stadttheater Koblänz worde. Bevor er 2006 as Diräkter ans Theater Basel choo isch, isch er acht Johr lang Intendant am Mainzer Stadttheater gsi. Under siner Laitig isch s Theater Basel 2009 zum Operehuus vom Johr gwehlt worde, dank Uffüehrige wie im Wagner si «Fliegender Holländer», d «Lulu» vom Berg und im Poulenc sini «Dialogues des Carmelites», dr Vilfalt vom Repertoire und em Zsämmeschaffe vom Ensemble. In Zsämmenaarbet mit em Schwizer Färnsee het er 2010 d «Aida am Rhein» dusse rund um die Middleri Brugg und im Hotel «Les Trois Rois» inszeniert. 2011 het er wäge de Finanzierigsschwiirikeite, wo s Theater überchoo het, wil s Baselbiet si Dail vo dr Subvention nid het welle vergrössere, d Laitig vo dr Operesparte sälber übernoh. Sit 2015 isch dr Delnon Intendant vo dr Staatsopere Hamburg.

Näbe siner Aarbet z Basel isch dr Delnon vo 2009 bis 2016 au Künstlerische Laiter vom Muusigtheater vo de Schwetzinger SWR Festspiil.

Literatur

• Alfred Ziltener: Georges Delnon. In: Andreas Kotte (Hrsg.): Theaterlexikon der Schweiz. Band 1. Chronos, Zürich 2005, ISBN 3-0340-0715-9, S. 443 f.