Galerii Stampa

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Baseldütsch

D Galerii Stampa isch e Galerii und Kunstbuechhandlig für Gegewartskunst am Spalebärg z Basel in dr Schwiz. Si spezialisiert sich uf Schwizer und internationali Künstler und gseht sich as Vermiddler vo aktueller Kunst.

1969 het d Stampa aagfange, regelmässig Ustellige vo zitgenössischer Kunst z organisiere in Kooperation mit de Künstler und Künstlerinne, wo usstelle. Drzue chömme anderi Dätikeite wie Seminar, Füehrige, Buechvorstellige und küstlerischi Darbietige. D Galerii berootet au bi Kunstchäuf.

D Buechhandlig isch en integrale Deil vo dr Galerii und bietet Kunstbüecher, Fotografie und Videos aa.

2006 het d Galerii Stampa dr Kulturbriis vo dr Stadt Basel überchoo drfür, ass si die zitgenössischi Kunst und dr kulturelli Dialog wurd fördere.

Künstler[ändere | Quälltäxt bearbeite]

Zu de Künstler, wo in dr Stampa usgstellt oder ufgfüehrt hai ghöre dr Amerikaner Vito Acconci, d Silvia Bächli, wo an dr Staatlige Akademii vo de Bildende Künst Karlsrueh underrichdet, d Baslere Miriam Cahn, d Südafrikanere Marlene Dumas, dr Schwizer Mooler Hanspeter Hofmann, dr Bildhauer, Grafiker und Mooler Josef Felix Müller, d Videokünstlere Pipilotti Rist, die Dütschi Rosemarie Trockel, wo an dr Kunstakademie Düsseldorf lehrt, dr schottisch Schriftsteller Ian Hamilton Finlay und e Hufe anderi.

Weblingg[ändere | Quälltäxt bearbeite]