Fritz Maurer

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Dr Fritz Maurer isch am 11. Oktobr 1901 z Diepflige uf d Wält cho und am 20. Jänner 1991 z Gälterchinde gschtorbe. Är isch reformiert, Gälterchinder und Diepfliker Eerebürger, Politiker und Unternämer gsi.

Sys Läbe[ändere | Quälltäxt bearbeite]

Dr Fritz Maurer isch dr Soon vom Fritz Maurer und dr Maria Louise Mohler gsi. 1927 het är d Bertha Ritter vo Buus ghürotet. Är isch z Böckte in d Bezirksschuel und het Chaufmaa gleert.

Dr Unternämer[ändere | Quälltäxt bearbeite]

Dr Fritz Maurer het d DrukereiFarnsburg“ und d Zytig „Gälterchinder Aazeiger“ gründet. 1930 het d Sydebandwäberei, die „Oberi“ oder „Roti Fabrik“ z Gälterchinde zuedo. Är het die 1936 chönne chaufe und het dörte e Forellezucht betrybe. Är het sich über die schlächti Kualitet vo de Welopnö gergeret und beschlosse sälber Reife z produziere; so het är, wo us em Gebiet vo Maloja z Graubünde schtammt, d Einzelfirma „Pnö- und Gummiwärk Maloya“ gründet. Zerscht het är numme Welopnö, schpöter au Schuesoole, Pnö für Töff, Auti und sogar Reife für Flugzüg produziert.

Politik und Vereinsläbe[ändere | Quälltäxt bearbeite]

Dr Fritz Maurer isch vo 1947 bis 1956 Landrot und vo 1963 bis 1967 Nationalrot gsi. Är het sich bsunders für d Vercherspolitik schtark gmacht. Är isch e aktive und guete Schütz und e yfrige Turner gsi. Als Wachmeischter isch är im Unteroffiziersverein Mitglyd gsi.

D Pnöfabrik Maloya[ändere | Quälltäxt bearbeite]

D Pnöfabrik Maloya het dr Name Gälterchinde wytumme bekannt gmacht und dr Umgäbig vo Gälterchinde Arbetsplätz und Verdienscht brocht. 1986 het dr Firmegründer Fritz Maurer si 85schti, d Maloya yre 50schte Geburtstag und yre sibemillionschte Reife chönne fyre. Rund 400 Persone hei bi dr Maloya gschafft. Scho 1989 het aber d Belegschaft müese verchlynert wärde und 1993 het d Erfolgsgschicht Maloya es abrupts Ändi gno, d Produkzion isch ygschtellt und die letschte 200 Persone wo no dört gschafft hei si, bis uf 17, entlasse worde. Uf Ändi 2004 het d Maloya denn yri Tor ändgültig gschlosse.

Literarischi Verwys[ändere | Quälltäxt bearbeite]

  • Basellandschaftlichi Zytig vom 8. Oktobr 1981 und 24. Jänner 1991. U.B.
  • Volksstimme vom Fritig, 29. Oktobr 2004 Syte 3

Extärni Verwys[ändere | Quälltäxt bearbeite]