Friide vo Münster

Gerhard der Borch. Der Friede von Münster. E Spanier und säggs Niiderländer beschwööre im Roothuus z Münster dr spanisch-niiderländisch Friidensverdraag.

Dr Friide vo Münster (niiderländisch Vrede van Münster, spanisch Tratado de Muñiste) het dr Achtzigjöörig Chrieg zwüsche Spanie und dr Republik vo de Siibe Veräinigte Niiderland beändet.

D Friidensverhandlige häi vo 1646 bis 1648 im Raame vom Westfäälische Friidenskongräss z Münster stattgfunde.

D Verhandlige

Dr Groof vo Peñaranda het die spanischi Chroone verdräte. Uf dr Site vo de Veräinigte Niiderland si zwäi Gsandti us Holland (äine drvo dr Godart van Reede) gsi, die übrige säggs Browinze Zeeland, Groningen, Utrecht, Friesland, Gelderland und Overijssel häi alli je äi Gsandte gschiggt. D Verhandlige häi in de Kwartier vo de Gsandte stattgfunde.

Dr Verdrag het d Inträssegmäinschaft zwüsche de Niiderland und Frankriich, wo gege Spanie grichtet gsi isch, beändet. Frankriich und Spanie häi im Pyreneäfriide 1659 Friide gmacht.

Am 30. Januar 1648 isch dr spanisch-niiderländisch Verdraag im Krameramtshuus, wo d Niiderländer iikwardiert gsi si und wo hüte s Huus vo de Niiderland häisst, underschriibe worde. Am 15. Mai 1648 häi die Gsandti dä Verdraag in ere fiirlige Zeremonii im Roothuus z Münster beschwoore.

Im Friide vo Münster si die Veräinigte Niiderland as suwerääne Staat anerkennt worde und si dorum au us em Häilige Römische Riich usgschiide.

Weblingg

• Dr Teggst vom Verdraag uf em Internet-Portal „Westfälische Geschichte“ lwl.org