S Frey-Grynaeische Instidut

S Frey-Grynaeische Instidut isch Däil vo dr Theologische Fakultäät vo dr Uniwersidäät Baasel. Es befindet sich am Höibärg 33 z Baasel.

S Frey-Grynaeum isch e Baasler Kulturguet, wo für d Region vo Bedütig isch.

Gschicht

S Instidut isch as e brivaati Stifdig im Joor 1747 entstande. Dr Baasler Theologiibrofässer Johann Ludwig Frey (1682-1759) het s zur Erinnerig an si Fründ und Kolleeg Johannes Grynaeus (1705-44) gstifdet mit em Zwäck, d Eer vo Gott und s Theologiistudium z fördere. D Stifdig het us ere Liigeschaft, dr Bibliothek vom Stifter und ere Gäldsumme bestande, für dass die theologischi Fakultäät e "Stiftigsbrofässur" chönnt iirichde. Für e sonigi Brofässur git s hüte kä Gäld me, aber im Frey si Uniwersalbibliothek us em 18. Joorhundert, wo sini Noochfolger no erwiteret häi, isch äini vo de bedütendste Büechersammlige us dere Zit.

D Liigeschaft am Höibärg in dr middelalterlige Stadt isch bis hüt en Ort für die theologischi Forschig. Verantwortlig für s Huus und d Bibliothek isch dr "Lektor", e Brofässer vo dr theologische Fakultaät.

Kwelle

Das Frey-Grynaeische Institut uf dr Website vo dr Uniwersidäät Baasel, abgrüeft am 16. Februar 2016