Fidget Spinner

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
en Fidget Spinner
en Fidget Spinner mid sächs Ärm, wen er stillstoot und wen er sech dräit

Dr Fidget Spinner (vom änglische fidget, das bedüütet ummewetze, zapple und ou Uruei oder Närvositäät, und to spin, das heisst chreise, sech dräje oder ummewirbel) isch es Spiilzüüg, wo ane 2017 ganz schnäll i vilne Länder begchannt und populär worden isch. Es git derfür di düütsche Näme Handchreisel oder au Propäller.

Das Gräät het zwöi Deili, i dr Middi e Bladde zum i d Finger nää mid emene Chugelelaager dinne, und drum ume en usseri Bladde mid Flügel, wo sech um s Chugelelaager dräit. I de Flügel usse het s Gwicht, und wäge dene dräit sech dr usser Ring we me ne agit ganz lang und me chan em zueluege. Mid de freie Finger vo dr Hand, wo d Middi hebt, oder au mid der andere Hand tuet me dr Flügel atriibe. Me cha s Spiilzüüg uf verschideni Arte hebe und derby chlyni Üebige mache.

Wär das Gräät erfunde het, isch umstritte. Me brichtet immer wider von ere erschte Form, wo d Catherine Hettinger, e Cheemikerin, ane 1993 gmacht und wo si derfür es Patänt übercho het. Das Objäkt het aber noni ganz so usgsee wie die aktuelle Fidget Spinner. Ane 2014 het dr Scott McCoskery es Metallobjäkt, wo sech es Deili dräit, erfunde, und är het s derno afo verchoufe. Und gly sind vo anderne Broduzänte äänlechi Sache usecho.

Im Monet März vom 2017ni het me blötzlech Filmli mit Fidget Spinner uf YouTube chönne gsee, und sofort het me zäntume vone gredt.[1][2][3] Dr Artikel ghört denn im Summer 2017 schynts grad zu de gfrogteschte uf dr Internetverchoufspladdform Amazon. Und scho gids au kriteschi Stimme zu däm Trend oder Häip.[4][5][6]

Gly sind d Fidget Spinner i vilne Schuelhüüser vo de Schueler bruucht worde. Me seit sid em Afang – und au i dr Wärbig –, s Hebe vo somene Gräätli tüeg eim beruehige, wenn me agspannt oder närvös sig, und me chönn sech dermit besser konzäntriere, fasch wie scho sid langem mid de Chnätbäll. Das isch zwoor vo dr Forschig nid undersuecht oder bstätiget, es wird aber immer wytergseit. I deil Schuele isch das Spiilzüüg für wäret em Underricht scho wider verbotte worde.[7]

Weblink[ändere | Quälltäxt bearbeite]

 Commons: Fidget Spinner – Sammlig vo Multimediadateie

Fuessnoote[ändere | Quälltäxt bearbeite]

  1. Das ist das begehrteste Spielzeug der Schweiz (Memento vom 22. Mai 2017 im Internet Archive) uf blickamabend.ch
  2. Wegen Fidget Spinner drehen Kinder durch (Memento vom 6. Juli 2017 im Internet Archive) uf luzernerzeitung.ch
  3. Der ideale Begleiter für unruhige Geister uf welt.de
  4. Fidget Spinner: 7 Gründe, keinen Handkreisel zu kaufen uf utopia.de
  5. Fidget spinners tops the list of this summer's dangerous toys uf today.com
  6. Verbraucherschützer warnen vor dem Fidget Spinner uf handelsblatt.com
  7. Dieses neue Spielzeug treibt Lehrer in den Wahnsinn uf welt.de