Felix Boehm (Physiker)

Dr Felix Hans Boehm (* 9. Juni 1924 z Basel; † 25. Mai 2021) isch e schwyzerisch-US-amerikanische Experimentalphysiker gsii, wu zue Chärnphysik, dr schwache Wächselwirkig un Neutrinophysik gforscht het.

Lääbe

Dr Boehm isch e Suhn vum Hans Georg Boehm, eme Buechdrucker un Verleger, un dr Marguerite geb. Philippi gsii. Är het an dr Uniwersiteet Gämf un dr ETH Züri Physik studiert, wun er anne 1948 sy Diplom gmacht un 1951 promoviert het. Anne 1952 isch er as Boese-Fellow in d USA gange an d Columbia University z New York zue dr Chien-Shiung Wu un 1953 an s California Institute of Technology (Caltech) zum Jesse DuMond un em Charles Lauritsen. Anne 1958 isch er Assistant Professor un 1961 Professor fir Physik am Caltech wore. Ab 1985 isch er dert William L. Valentine Professor of Physics gsii un ab 1995 Professor Emeritus. 1961 isch er Sloan Research Fellow wore. Anne 1960 isch s em Boehm glunge, dr speter Nobelbryysdreeger Rudolf Mößbauer an s California Institute of Technology z hole.

1957/58 isch dr Boehm Gaschtbrofässer an dr Uniwersiteet Haidelberch (uf Yyladig vu Johannes Hans Daniel Jensen) gsii un 1965/66 an dr Uniwersiteet Kopenhagen. 1971/72 isch er am CERN gsii, 1979/80 am Laue-Langevin-Inschtitut z Grenoble, am Paul Scherrer Inschtitut, 1980 an dr LMU Minche un 1981 an dr ETH Züri. E friejer Aagebot vun ere Professur an dr ETH het er zuegunschte vum Caltech uusgschlaa ghaa.

Forschigsschwärpinkt

Är het si in dr 1950er Johr vor allem mit Experimänt zue dr Paritetsverletzig bscheftigt, die Verletzig isch zerscht vu dr C. S. Wu experimentäll uusegfunde wore, was dr Boehm mit em Aaldert Wapstra 1956 bstetigt het (dur Mässig vu dr zirkulare Polarisation vu dr Gammastrahle im Betaverfall). Doderby isch er au mit dr Theoretiker Richard Feynman un Murray Gell-Mann in Kontakt chuu. Speter het er si mit Röntgenschpektroskopy in dr Chärnphysik bscheftigt (Isotopeverschiebig vu K-Schale-Elektrone, speter Muone am CERN un LAMPF z Los Alamos), mit Neutrinophysik (zum Byschpel het er in dr 1980er Johr am Paul Scherrer Inschtitut umesunscht no Neutrino-Oszillatione gsuecht) un Experimänt zum Dopplete Betaverfall, wu unter anderem im Gotthardtunäll uusgfiert wore sin. Är het au lang umesunscht no Verletzige vu dr Zytumchehrinvarianz in dr Chärnphysik gsuecht (het aber mit syre Gruppe oberi Schranke gfunde). Anne 1970 het er Verletzige vu dr Pariteet in dr Chärnphysik gfunde (bschaubar as zirkulari Polarisation in Gammaverfäll vu uupolarisierte Chärn). Doderby het er syt 1970 mit em Theoretiker Petr Vogel vum Caltech zämegschafft.

Ehrige

Ab 1983 isch er Mitglid vu dr National Academy of Sciences gsii. 1995 het er dr Tom-W.-Bonner-Bryys fir Chärnphysik vu dr American Physical Society iberchuu,1980 het er dr Humboldt-Forschigsbryys gwunne un 2006 isch er zum Fellow vu dr American Association for the Advancement of Science gwehlt wore.

Schrifte

• Boehm, Vogel Physics of massive neutrinos, Cambridge University Press 1987, 1992

Weblink

• Oral History Interview 1999
• Biografy bi dr APS
• Laudatio zum Bonner-Bryys
• Kurt Alder: Felix H. Boehm. In: Historisches Lexikon vo dr Schwiiz. 3. März 2011.

Fueßnote

Dä Artikel basiert uff ere fräie Übersetzig vu dere Version vum Artikel „Felix_Boehm_(Physiker)“ vu de dütsche Wikipedia. E Liste vu de Autore un Versione isch do z finde.