Fabian Bösch

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Der Fabian Bösch (* 6. Juli 1997, Bürger vo Hirschthal[1]) isch e Schwiizer Schyfaarer.

sis Läbe[ändere | Quälltäxt bearbeite]

Der Fabian Bösch isch der Soon vom Markus und der Michèle Bösch. D Familie het zerscht z Länzbrg gläbt und won der Fabian föifi gsi isch, sinds uf Ängelbärg züglet.[2] Er isch scho gly em Schyklub Ängelbärg byträtte, und für dä het er es bar Schyrönne vo de Juniore gwunne. Füre Verband Swissski isch er ad Schüelerwältmeischterschaft z Italie, und mit drizääni isch er Slalom-Schwiizermeischter worde.

Sid 2011 isch er bi de Schy-Freestyler derby. Zum wytercho isch er uf d Sportmiddelschuel z Ängelbärg ggange. 2012 isch er Schwiizermeischter im Slopestyle Schy gsi.

Sid 2013 isch der Bösch bi de Rönne vom Wältcöp derby. Anne 2013 het er a die Olympische Winterspiili z Sotschi chönne goo. Und sider isch er es bar Mol bi internazionale Rönne ufs Podescht cho. A der Freestyle-Schy-Wältmeisterschaft 2015 het er im Slopestyle gwunne, und i der glyche Saison au im Big Air am Jon Olsson Invitational-Wettkampf z Åre (Schweede).

A de Winter-X-Games anne 2016 z Aspen im amerikanische Bundesstaat Colorado het der Fabian Bösch i der Disziplin Big Air Guld gwunne. Im Februar 2019 het er a der Freestyle-Schywältmeisterschaft z Park City im US-Bundesstaat Utah im Big Air, wo’s s erschte Mol anere Wältmeisterschaft ggää het, mit schwirige und schöne Sprüng au wider d Guldmedalie gholt.

Varia[ändere | Quälltäxt bearbeite]

För Schlagziile gsorget hät de Fabian Bösch a de Olympische Winterspiil 2018 z Südkorea mit eme Video, won er uf Instagram veröffentlicht hät. Me gseet en döt, wien er uf uugwöhnlechi Art, e Rollträppe ufe fahrt.[3]

Weblink[ändere | Quälltäxt bearbeite]

Fuessnote[ändere | Quälltäxt bearbeite]

  1. Fabian Bösch Portrait uf swissolympicteam.ch abgruefen am 4. Februar 2019
  2. Seine Leidenschaft für Slopestyle brachte diesen 16-Jährigen nach Sotschi Artikel uf aargauerzeitung.ch vom 21. Februar 2014
  3. «Würde Lindsey Vonn die Rolltreppe gern zeigen» Artikel uf 20min.ch vom 14. Februar 2018