Die Ersti Kiirche vom Christus Wüsseschaftler z Baasel

47.553657.5956

Dialäkt: Baseldütsch

Blick uf d Front mit em Iigang

Vo dr Site us gsee

Im Innere, Blick uf d Kanzle und uf d Orgleempore

Die Ersti Kiirche vom Christus, Wüsseschaftler am Picassoplatz 2 z Baasel isch emol e Kultusgeböid vo dr Religionsgmäinschaft Christligi Wüsseschaft gsi. Hüte isch si im Bsitz vom Kanton Baasel-Stadt und isch umbaut worde für s Simfoniiorchester Baasel, wo dört e Halle für Broobe und für Büroo für d Verwaltig iigrichdet het. S Geböid gältet as Bischbil für die sogenannti anderi Modärne vom 20. Joorhundert in dr Schwiz und isch im Dänggmolverzäichnis ufgfüert.

Dr Bau

Dr Archidekt Otto Rudolf Salvisberg het s Geböid blaant und 1935 het er mit em Baue aagfange. 1936 isch d Kiirche iigweit worde. Sit 2016 wird si nüm vo dr Christlige Wüsseschaft brucht, und die het si für öbbe säggs Millione Franke an dr Kanton verkauft/

Archidektur und Usstattig

Dr Bau befindet sich im Innere vom ene Hüüserblock. Bim Iinecho got mä dur e groossi Iigangshalle mit Nääberüüm. Dr Saal het d Form vom ene Trapez, wo die chürzisti Site bi dr Kanzle het. Er isch äifach gstaltet mit ere filigrane Holzdecki und verbutzte Wänd. In de Sitewänd het s e Räije vo schmale hooche Fänster. Vom Iigang zum Lääsipult aane goot dr Boode abwärts.

Oobe an dr Kanzle befindet sich d Orgleempore, uf dr Site wisawii en Empore mit Sitz für d Mitgliider vo dr Gmäind. Im ganze hets für mee as 800 Lüt Blatz ghaa. Über dr Iingangshalle isch dr Saal für d Sunndigsschuel gsil mit sinere iidrucksvolle Glasfront.

D Orgle

Detai im Ghüüs vo dr Orgle

D Orglebaufirma Kuhn us Männedorf het 1936 en Orgle mit drei Manual und Bedal baut, mit im Ganze 26 Register; s Wärk het d Opusnummere 780. D Spiil- und Registerdrakdur isch elektrisch. S Pfifewärk isch uf ere Büüni ooben am Lääsipult ufgstellt und stoot uf Däschelade, dr Spiildisch befindet sich im Kiircheruum in ere Verdiefig rächts näben em Lääsipult. D Disposizioon isch eso:

I Manual C– Bourdon doux 16′ Roorflöte 8′ Flautino 8′ Salicional 8′ Vox angelica 8′ Suavial 4′ Nachthorn 4′ Plein Jeu V–VI Drumbeete 8′ Schalmei 4′ Tremolo

II Manual C– Tibia Clausa 8′ Gämshorn 4′ Blockflöte 4′ Quinte 2 2⁄3′ Sesquialter II Waldflöte 2′ Terzflöte 1 1⁄3′ Englischs Horn 8′

III Manual C– Principal 8′ Hoolflöte 8′ Gämshorn 8′ Octav 4′ Octav 2′ Mixtur 2 2⁄3′

Pedal C– Principalbass 16′ Subbass 16′ Echobass 16′ Flötbass 8′ Gedacktbass 8′ Choralbass 4′ Fagott 16′

• Kopple: II/I, III/I, III/II, I/P, II/P, III/P
• Transmissione: Schalmei 4′ us III, Drumbeete 8′ us III, Englischs Horn 8′ us II, Fagott 16′ us P

Sit 2018

Äänlig wie wie s scho bi de Kultusgeböid vo dr Christlige Wüsseschaft z Züri und z Bärn bassiert isch, wo zu Prooberüüm für d Filharmonia Züri bzw. zum «Yehudi Menuhin Forum Bärn» umbaut worde si, het mä s au z Baasel gmacht und d Kiirche zum e Brooberuum für s Simfoniiorchester Baasel umbaut. Im obere Stock het s Zimmer für d Gschäftsläitig vom Orchester. S Brojekt isch s Resultaat von ere änge Zsämmenarbet mit dr Dänggmolpflääg.

Weblingg

 Commons: Erste Kirche Christi, Wissenschafter (Basel) – Sammlig vo Multimediadateie

• Informationen des Hochbauamts Basel-Stadt zum Umbau (mit Bildergalerie)
• Informationen zur Orgel Website der Firma Orgelbau Kuhn AG