Ernst Niefenthaler

Dr Ernst Niefenthaler (* 31. Dezämber 1894 z Bürchau; † 17. Augschte 1970 au dert) isch e dytsche Buur un Dialäktdichter gsii.

Lääbe

Dr Niefenthaler isch z Bürchau im Chlaine Wisedal uf d Wält chuu un dert uf em Buurehof vu syne Eltere ufgwachse. Mit 20 Johr het sy Militerdienscht im Erschte Wältchrieg an dr Weschtfront glaischtet. Do het er syni erschte Gedicht gschribe, uf Hochdytsch un au scho uf Alemannisch, un het in däne dr Chrieg verschafft. Noch em Chrieg het er anne 1920 d Maria Asal ghyrote un het mit ihre dr Hof vu dr Eltere ibernuu. Si hän zäme fimf Chinder ghaa. Är het si fir dr Zämeschluss vu dr Buure yygsetzt un isch au langi Johr, vu 1926 bis 1945, im Gmairoot vu Bürchau ghockt. Im Zweete Wältchrieg sin zwee Sihn vum Niefenthaler gfalle. Anne 1956 het er e Härzinfarkt ghaa. Im Johr 1970 het er mit syre Frau no d Guldi Hochzyt chenne fyyre un isch derno im nämlige Johr im Summer gstorbe. Dr Niefentaler isch e aifache Buur gsii, drotz dr Schicksalsschleg isch er e zfridene un dankbäre Mänsch blibe.

Erschti Läsige het dr Niefenthaler u. a. bim Hertiger Hebelschoppe ghaa, erschti Publikation in Lokalzytige un Zytigsbylage, wie z. B. in Feldbergs Töchterlein, dr Sunntigsbylag vum Markgräfler Tagblatt. Dr Niefenthaler het zwai Biecher mit alemannische Gedicht publiziert, „Dr Weg berguf“ anne 1955 un „Hinterm Pflug“ anne 1967, derzue het er 1965 e Band mit Prolog zue dr Hebeloobe uusegee, wu au uf Alemannisch gsii sin. Syni aifache, aber diefgrindige Gedicht sin bregt vum Buurelääbe un vu dr Haimet rund um dr Belche. Anne 1960 het er vu dr Gmai Huuse fir syni Gedicht d Johann-Peter-Hebel-Gedenkplakette iberchuu, är isch dr erscht Bryysdreeger vu däre Uuszaichnig gsii.

Anne 1964 isch er Ehrenburger vu dr Gmai Bürchau wore, wu sällmol no sälbschtändig gsii isch. 1969 isch er Ehremitglid vum Schwarzwaldverain Schopfe un vum Gschichtsverain Markgreflerland wore. Uf em Feldberger Dichterwegli isch em Niefenthaler e Station gwidmet. Z Schopfe-Langenau isch d Niefenthalerstraße noch em gnännt wore.

Wärch

• Dr Weg berguf. Alemannische Gedichte. Nachwort von Emil Imm. Verlag Moritz Schauenburg, Lahr/Schwarzwald 1955 67 S. (Silberdistel-Reihe 14)
• Heimatbund Kleines Wiesental (Hrsg.): Prologe zu den Hebelabenden. Uehlin, Schopfheim 1965. 43 S.
• Hinterem Pflueg. Verlag Moritz Schauenburg, Lahr/Schwarzwald 1967. 81 S. Ill. (Silberdistel-Reihe 110)
• Karl Seith zum Gedenken (Gedicht), In: Das Markgräflerland, Heft 2/1968, S. 53 Digitalisat
• Dr Summervogel (Gedicht). In: Das Markgräflerland, Heft 1/1969, S. 57 Digitalisat
• Dr Bur im Volch (Gedicht). In: Das Markgräflerland, Heft 2/3 1969, S. 79 Digitalisat
• Zuem 70. Geburtstag (Gedicht). In: Alemannisch dunkt üs guet. 1/2015, S. 27 pdf

Literatur

• Gerhard Jung: An Ernst Niefenthaler zum "Fünfundsiebzigsten." In: Das Markgräflerland, Heft 2/3 1970, S. 148–149 Digitalisat
• Gerhard Jung: Ernst Niefenthaler. Bauer und Mundartdichter (1894–1970). In: Das Markgräflerland, Heft 1/1985, S. 150–152 Digitalisat
• Gerhard Jung: Ernst Niefenthaler. In: Badische Heimat. – 65. 1985, S. 466–468
• Peter Hendrik Paul: Freundeskreis Philipp Flettner – Ernst Niefenthaler e.V., Bürchau. In: Das Markgräflerland, Band 2/1998, S. 146–152 Digitalisat
• Fritz Schülin: Ernst Niefenthaler zum Fünfundsiebzigsten an Silvester d.J. In: Das Markgräflerland, Heft 2/3, 1969, S. 78 Digitalisat
• Kurt Ückert: Der Bauerndichter Ernst Niefenthaler – ein Lebenslauf, 1973
• Ludwig Vögely: Gedenkblatt für Ernst Niefenthaler : 1894–1970. In: Badische Heimat. – 75. 1995, S. 495–501

Weblink

• Ernst Niefenthaler uf LEO-BW
• Muetterspröchler widmen sich Ernst Niefenthaler, Badische Zeitung, 27. März 2013
• dr Ernst Niefenthaler uf em Wiesentäler Alemannenweg
• Niefenthaler Ernst uf alemannische-seiten.de