Elsa Schiaparelli

Us der alemannische Wikipedia, der freie Dialäkt-Enzyklopedy
Hops zue: Navigation, Suech
S rose shocking Schiaparelli Etikett

D Elsa Schiaparelli (* 10. Septämber 1890 z Rom; † 13. Novämber 1973 z Bariis) isch e italiänisch-franzöösischi Moodedisäinere gsi.

Lääbe und Wärk[ändere | Quälltäxt bearbeite]

Ihri Karriere het aagfange, wo si für sich e schwarze Bulli gstrickt het mit ere wisse Schläife und wisse Manschette, und dä bin ere Moodeschau aaghaa het. Dä Bulli het dr Schriftstellere Anita Loos eso guet gfalle, ass si iiri Bekannte und Fründinne zur Schiaparelli gschickt het, drunder d Joan Crawford, d Gloria Swanson, d Greta Garbo, d Norma Shearer und d Mae West.

1928 het d Schiaparelli iiren erste Laade ufdoo und fümf Joor spööter het si scho acht Buddike z Bariis und äini z London gha. Mä het gsäit über sä, ass si dr Surrealismus und dr Dadaismus in d Moode brocht häig. Si het au Barfüm entwicklet: "Shocking" und "Si", wo d Juliette Greco e Lied, dr "Valse de Si", drüber gsunge het, wo dr Henri Sauguet gschriibe het. Dr Pablo Picasso und dr Salvador Dalí häi zu iire Fründ ghöört, und dr Jean Cocteau het Stoffmuster für sä entworfe.

1936 het si dr Rissverschluss in d Haute Couture brocht. Si het au s sogenannte Dianakolltee gsellschaftsfäig gmacht, wo bin em äi Aggsle ganz blutt gsi isch. Si isch äini vo de erste Moodeschöpferinne gsi, wo nid nume Chläider entworfe het sondern au Aksessuar: Händsche, Schaal, Schmuck, Uure und Baadaazüüg häi iir Etikett druff ghaa.

Wo dr Zwäit Wältchrieg usbrochen isch, isch si uf Nöi York. 1945 isch si uf Bariis zrugg, wo sich aber d Moode sithäär stark veränderet het: dr Minimalismus isch "in" gsi, die äifache Kreazioone vo dr Coco Chanel häi als "chic" gulte, und dr farbig, "surrealistischi" Stil vo dr Schiaparelli isch nüm aachoo. 1952 het si iir Ateliee müesse schliesse, aber iiri Woonig isch e Dräffpunkt vo dr Bariiser Moodewält bliibe.

Weblingg[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Elsa_Schiaparelli“ vu de dütsche Wikipedia.

E Liste vu de Autore un Versione isch do z finde.