Eduard Strübin

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Dr Eduard Strübin (* 18. Jänner 1914 z Lieschtel; † 10. Aprelle 2000 z Gälterchinde) isch e Schwyzer Sekundarleerer, Schriftschteller und Volkskundler gsi. Är isch Bürger vo Lieschtel gsi.

Sy Härkunft und Usbildig[ändere | Quälltäxt bearbeite]

Dr Eduard Strübin isch dr Soon vom Bekker Strübin gsi. Wo är föifi gsi isch, isch im d Mueter gschtorbe. Är isch z Lieschtel sächs Joor in d Primar- und drü Joor in d Bezirksschuel gange. Drno isch är ins Humanischtische Gimnasium z Basel yträtte. Nach dr Matur het är Germanischtik und Altfilology gschtudiert. Im Joor 1937 het dr Eduard Strübin syni Schtudie in Dütsch, Französisch und Latin mit em Mittelleererexame abgschlosse. 1947 het är d Ruth Laubscher us Täuffele ghürotet. Si hei drei Töchtere gha.

Sy Bruef[ändere | Quälltäxt bearbeite]

Sy erschti feschti Aaschtellig het dr Eduard Strübin an ere Privatschuel z Flims-Waldhuus gha. Vo 1942 bis zu synere Pangsionierig im Joor 1978 het är an dr Meitlisekundarschuel, dr schpötere Real- bezw. Sekundarschuel Gälterchinde, gleert. 1954 isch d Bezirksschuel Böckte uf Gälterchinde verleit worde. Wo im zuegsicheret worden isch, me wärdi au in dr nöije Schuel Buebe und Meitli trennt unterrichte, het är d Beruefig an d Meitlisekundarschuel Lieschtel abgleent. Schpöter het är denn aber doch no müesse gmischti Klasse unterrichte. Die rueigi Art vom Leerer Strübin het in bi syne Schüelerinne und Schüeler seer beliebt gmacht.

Dr Volkskundler[ändere | Quälltäxt bearbeite]

Dr Eduard Strübin het sich voll und ganz dr Volks- und Heimetkund gwidmet. Bsunders aktiv isch är nach synere Pangsionierig worde. Är het syni Schtudie in Heimetblettere, Heimetbüecher, Heimetkunde, Fachschrifte usw. chönne publiziere. Sys liebschte Chind isch die 1966 erschineni Heimetkund vo Gälterchinde gsi. Do isch är eine vo dene gsi, wo s Meischte zur Gschtaltig und vom Material ybrocht het; eine vo de Chöpf. Die Heimetkund isch e Art Muschterexemplar für anderi Heimetkunde gsi und im In- und Usland bewunderet worde.

Dr Eduard Strübin isch in keim Verein aktiv gsi, är het sich au nie politisch betätigt. Sy Passion isch s Läse, s Hinterfroge und s Beobachte vom dörflige Läbe und de kulturelle Aktivitete gsi, au s Ufschrybe vo syne Beobachtige. S Alltägliche, dr Wandel und d Wärtveränderige hei in interässiert.

Sy grossi Sammlig vo Dokumente und Fotene, wie au syni Notize, wo är muschtergültig in übersichtlige Karteie ygordnet gha het, het är dr Ortssammlig Gälterchinde, im Schtaatsarchiv Baselland und im Archiv für Volkskund z Basel gschänkt.

Syni Wärk[ändere | Quälltäxt bearbeite]

Gege hundert Wärk schtamme us em Eduard Strübin syner Fädere. Die sibe Wichtigschte sy:

  • „Baselbieter Volksleben“, Sitte und Brauch im Kulturwandel der Gegenwart. Basel 1952.
  • „Grundfragen des Volkslebens bei Jeremias Gotthelf“. 1959. Schweizerisches Archiv für Volkskunde Basel.
  • „Baselbieter Sagen“ Liestal 1976. Quellen und Forschungen zur Geschichte und Landeskunde des Kantons Baselland, Liestal 1952 ff, Band14
  • „Zur deutschschweizerischen Umgangssprache“. Basel 1976. Schweizerisches Archiv für Volkskunde Basel.
  • „Müschterli us em Baselbiet“. Liestal 1980. Baselbieter Heimatblätter.
  • „Jahresbrauch im Zeitenlauf“, Kulturbilder aus der Landschaft Basel. Quellen und Forschungen zur Geschichte und Landeskunde des Kantons Baselland, Liestal 1952 ff
  • „Kinderleben im alten Baselbiet“. Quellen und Forschungen zur Geschichte und Landeskunde des Kantons Baselland, Liestal 1952 ff

Eerige[ändere | Quälltäxt bearbeite]

  • 1962 Doktertitel honoris causa vo dr Uniwärsitet Basel
  • 1980 Kulturprys vom Kanton Baselland
  • 1984 Eeremitglidschaft in dr Schwyzerische Gsellschaft für Volkskund
  • 1989 „Fest und Brauch“. Feschtschrift zum föifesibzigschte Geburtstag vom Eduard Strübin, uusegee vom Dominik Wunderlin. Lieschtel 1989

Literatur[ändere | Quälltäxt bearbeite]

  • Heimatkunde Gelterkinden 2003

Weblink[ändere | Quälltäxt bearbeite]

Literatur vum un iber de Eduard Strübin im Katalog vu dr Dütsche Nazionalbibliothek