Edgar Rabsch
| Dialäkt: Schwäbisch |
Dr Edgar Rabsch (* 5. Auguscht 1928 z Tiefenfurt, † 17. Juli 1990 z Ulm) ischt a deitscher Kirchamusiker (Kombonischt, Kantor, Organischt) gwäa. Om et mit-em gleichnamiga Musikpädagoga vrwechslet zo werra, hôt’r seine Werk meischdens mit Edgar Rabsch-Tiefenfurt kennzoichnet.
Aus seim Leaba
[ändere | Quälltäxt bearbeite]Dr Edgar Rabsch kommt em Johr 1928 em schlesischa Ort Tiefenfurt en dr Nähe vo Bunzlau uff d Welt, wo-nr au aufwechst. Nôch dr Omsiidlong en de jong Bundesrepublik Deitschland studiirt’r an dr Kirchamusikschuel Esslenga evangelischa Kirchamusik. Seine wichdigschde Lehrer send deet dr Hans-Arnold Metzger ond dr Karl Gerok. Hendrher schliaßet sich noh Studia beim Siegfried Reda (1916–1968) ond bei dr franzeesischa Musikpädagogin Marie-Claire Alain (1926–2013) ôô.
Sei erschda hauptamtlicha Stell als Kantor ond Organischt kriagt dr Rabsch 1951 an dr Stiftskirch z Backnang. Des Amt fillt’r 21 Jôhr lang aus. Neabaher grendet’r em Jôhr 1963 d Sing- und Musizierwoche für junge Leute en dr ehemaliga Benedikdiner-Abtei Kloschder Lorch. 1972 schliaßlich wuud dr Rabsch dr Erscht Organischt ond Kantor am Ulmer Minschder. Zo seine Uffgaba gheeret sowohl d Leidonga vom Ulmer Motedda-Chor, vom Ulmer Oratoriachor wia au vom Jugendchor vo dr Minschderkandorei. 1979 kriagt’r an Lehrufftrag an dr Staatlicha Hochschuel fir Musik en Trossenga. Sei Amt als Kirchamusiker fillt dr Rabsch z Ulm bis zo seim Dood em Jôhr 1990 aus. En sellem Jôhr schliaßt’r am 17. Juli seine Auga fir emmer. Knabb 62 Jôhr send deam Môô zom Leaba vrgennt gwäa.
Ehronga
[ändere | Quälltäxt bearbeite]- 1963 hôt dr Obrkircharat vo dr Evangelischa Landeskirch en Wirdaberg em Edgar Rabsch da Ehratitl Kirchenmusikdirektor vorliha.
- 1980 ischt em Edgar Rabsch s Bundesvordinschtkreiz vorliha wôrra.
- 1986 isch dr Edgar Rabsch vo dr Staatlicha Hochschuel fir Musik Trossenga zom Honorarprofessor ernannt wôrra.
A Auswahl vo seine Werk
[ändere | Quälltäxt bearbeite]Em Lauf vo seim Leaba hôt dr Edgar Rabsch an Haufa Werk fir Orgl, Chorsätz ond Kandada gschaffa. Als Beispiil seiet hervorghoba:
- Auf, auf, mein Herz mit Freuden, Orglfandasii
- Christ ist erstanden, Choralfandasii fir Orgl
- Großer Gott, wir loben dich, Kandade fir Chor, Gemeinde ond Bläser
- Wie freundlich sind deine Wohnungen, Kandade zom 600. Jubileom vom Ulmer Minschder (1977)
- Leihe Gunst mir, Gott, dui Kandade hôt dr Rabsch em Ulmer Oratoriachor zo seim 90-jähriga Jubileom gwidmet (1980)
- Lobe den Herren, den mächtigen König der Ehren, Variazioona fir Orgl (1984)
- Victimae paschali laudes, Konzert fir Bläser, Orgl ond Schlagzeig
Quella
[ändere | Quälltäxt bearbeite]- Siegfried Bauer: Württembergische Größen der Kirchenmusik, a Ardikel en dr Festschrift Landeskirchenmusikfest 2017, rausgäa vo de Württembergische Blätter für Kirchenmusik, Ausgab 3/2017, S. 64–73