Edelschimmel
As Edelschimmel wärde Schimmelbilz-Arte bezäichnet, won e Naarigsmiddel für e Mensch nit ungniessbar mache, sondern verbessere.
Vo de 130'000 Bilzarte si nume e baar milchwirtschaftlig nutzbar und eso für d Häärstellig vo Chääs as Rifigsorganisme gäignet. Dr Underschiid zu schädlige Kulture isch, ass si em Chääs nume iiri spezifische Aroma gääbe, aber für e menschlig Organismus harmlos si. Si zele dorum zu de Edelbilz und wärde as bsundrigs wärtvoll aagluegt. Zum d Bildig vo Schimmel z fördere, wärde bestimmti Chääsarte wääred em Rifigsbrozäss mit bräite Noodle pikiert, also gstoche, sodass dur die Löcher Suurstoff in Chääs iine cha. Das förderet d Bildig vo Schimmel.
Zum Schimmelchääs mache, wärde Kulture vo Schimmelbilz verwändet, zum Bischbil für d Blauschimmelchäässorte Roquefort dr Penicillium roqueforti und für e Kamamber und Brie dr Penicillium camemberti oder dr Penicillium candidum.
Bilzkulture spiile au bim Wiimache e Rolle, dört reedet mä vo Edelfüüli, und bim Wurstmache: für e ungarisch Salami brucht s sogar zwäi verschidnigi Schimmelbilzwariante: Zerst e blaugrüene Schimmel, wo denn wie d Wurst rifer wird vom ene wisse Schimmel abglööst wird. Dä git dr Salamihut iiri charakteristischi wissligi Farb.
Bi dr Herstellig vo Culatello sorgt en Edelschimmel für dr Gschmack vom Schingge.
Au zum Sojasoosse mache setzt mä Edelschimmel-Kulture wie zum Bischbil Aspergillus oryzae ii.
|
Dä Artikel basiert uff ere fräie Übersetzig vu dere Version vum Artikel „Edelschimmel“ vu de dütsche Wikipedia. E Liste vu de Autore un Versione isch do z finde. |