Camembert (Käse)

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Kamamber

Kamamber isch en ursprünglig franzöösische Wissschimmelchees. Under em Naame Camembert de Normandie AOC het er e gschützti Härkumftsbezäichnig: Nume eme Kamamber, wo in dr Normandii us Roomilch gmacht isch, daf mä Camembert de Normandie sääge. Dr Name Camembert hingeege daf jede bruche.

Usgsee und Gschmack[ändere | Quälltäxt bearbeite]

D Kamamberläib si klassischerwiis öbbe 250 Gramm schweer, mäistens kräisförmig, sältener ovaal oder eggig und von ere wisse Edelschimmelrinde überzooge. Dr Däig vom Kamamber isch je noch däm, wie rif dr Chees isch, hell- bis goldgääl. Wäärend em Rifigsbrozäss chönne Gäärlöcher entstoo, wo aber dr Gschmack vom Chees nit beiiflusse.

Dr Gschmack isch liicht scharf und nussig. Dr Chees isch e chli weeniger fett as dr Brie, und eso e chli „drochniger“ im Gschmack. Wenn er die richdigi Rifi het, isch er milder. Überrife Kamamber, wo verlauft, wenn män en aaschniidet, entwicklet vilmol e Ammoniaknoote, wo as unaagnääm empfunde wird.

Dr rif Kamamber het e relatiiv wäichi, greemigi Konsistänz und mä chan en liicht uf e Brootschnitte oder e Weggli striiche. Dr Chääs cha paniert bröötlet wärde oder mä chan en zum Überbache bruuche.

100 Gramm Kamamber mit 45 Brozänt Fett in dr Drochemasse häi en Energiiwärt vo öbbe 1250 kJ (300 kcal). Dä Wärt cha je noch em Brodukzioonsverfaare e chli schwanke.

Herstellig[ändere | Quälltäxt bearbeite]

D Herstellig vom dradizionelle Kamamber us früscher Roomilch brucht öbbe drei Wuche. Am erste Daag wird d Milch gsüürt und im ene ghäizte Ruum (28 bis 30 °C) in groosse Chessel uf öbbe 36 °C aagwermt und mä duet Lab drii, ass es grinnt. D Gallerte wo mä eso überchunnt, wird vorsichtig, ooni si z bräche, in übbe fümf Schichte in äinzelni Cheesforme doo; eso blibt im Chees e Hufe Molke, und er bechunnt e greemigi Textuur. Wenn dr Chees gnueg aadrochnet isch, dräit män en um.

Am zwäite Daag nimmt mä dr Chees us dr Form und im Salzruum, wo s 18 bis 20 °C warm isch, ströit mä Salz uf en vo alle Siite und behandlet män en mit em wisse Edelschimmel Penicillium camemberti, wo für s Waggse vo dr wäiche Bilzflora uf dr Oberflechi vom Chees sorgt. Am dritte Daag chunnt dr Chees in dr Rifiruum, wo s immer e Tämpratuur zwüsche 10 und 14 °C het. Für zum rif wärde brucht er je noch dr Jooreszit öbbe 12 Dääg, denn cha män en verpacke. Denn loot mä sä nonemol vier bis fümf Dääg bi öbbe 9 °C lo rife, bis si schliesslig in Handel chömme.

Liddratuur[ändere | Quälltäxt bearbeite]

Weblingg[ändere | Quälltäxt bearbeite]

 Allmänd (Commons): Camembert – Sammlig vo witere Multimediadateie
Dä Artikel basiert uff ere fräie Übersetzig vum Artikel „Camembert_(Käse)“ vu de dütsche Wikipedia.

E Liste vu de Autore un Versione isch do z finde.