DreyEcker
De DreyEcker isch e Regionalwäärig gsi, wo vùm Januar 2007 bis zum Januar 2011 im Wiisedaal im Ùmlauf gsi isch. Dr DreyEcker isch als Komplementärwäärig zum Euro dacht gsi ùn het sölle di regionali Wirtschaft ùn regionali Wirtschaftschreisläuf ùnterstütze. Dur des het di regionali Wirtschaft aakùrblet werde sölle ùn Arbeitsblätz gschaffe werde. D Bezeichnig leitet sich vùm Dreyeckland ab, dr Bezeichnig für d Gränzregion Schwyz – Südbade – Elsass.
Bruucht werde chönne het dr DreyEcker nùmme bi bstimmte Gschäft, wo freiwillig dra deilgnoo hen: z Schopfe, Huuse, Löörech, Wyl, Badisch-Rhyfälde, Chandere ùn Efrige-Chilche.
Zur Verwändig vùm DreyEcker isch es notwändig gsi, in de bytragsfreie Trägerverei yzträte. Dr DreyEcker isch nooch 3 Monet verfalle, wänn kei Verlängrigsmarke, wo 2% vùm Wärt choscht het, drùffbäbt worde isch. Die Sùmme isch zur Fördrig vo regionale Verein yygsetzt worde. Bim Zrùggùmtuusch ni Euro isch e Gebühr vo 5% erhoobe worde. Dur de Wärtverlùscht het sölle verhindret werde, dass s Gäld ghortet wird.
Bis Mai 2007 isch e Sùmme vo 10.258 DreyEcker im Ùmlauf gsi ùn im letschte Joor 2010 sin DreyEcker im Wärt vo €47.500 im Ùmlauf gsi. Im Januar 2011 isch de DreyEcker deno vo de Initiante ussem Vercheer zoge worde. Er het sölle dur e neui Komplementärwäärig ersetzt werde. Insgsamt hät de DreyEcker in dänne Joor e Chaufchraft in Euro vo über €500.000 gha.[1][2]
Regionalwäärige sin in viilene Länder verbreitet. Di grööschti isch d Schwyzer WIR-Bank, wo syt 1938 im Ùmlauf isch. Di grööschti Regionalwäärig vo Dütschland isch de Chiemgauer (Bayern). Im Alemannische Sproochruum sin usserdäm dr Rössle Regional (Stueget) ùn dr Regio Ostallgäu im Ùmlauf.