Dorothea Störr-Ritter

d Dorothea Störr-Ritter bi dr Verleiig vu dr Staufermedaille an Werner Käß, 2015

D Dorothea Störr-Ritter, geb. Störr, (* 27. Augschte 1955 z Fryburg) isch e dytschi Bolitikeri (CDU) un Landreeti vum Landkrais Brysgau-Hochschwarzwald.

Uusbildig un Beruef

No dr Grundschuel vu 1962 bis 1965 un em Gimnasium vu 1965 bis 1974 z Waldkirch het d Dorothea Störr-Ritter Rächtswisseschafte an dr LMU Minche un dr Uniwersitet Konschtanz studiert. Noch em Referendariat bim Landgricht Rautweil het si anne 1982 ire zwait juristisch Staatsexame abglait. Syt 1989 het si as Rächtsaawälti in Kanzleie z Waldkirch, z Stuegert, z Fryburg un z Dodtnau gschafft. Vu 2002 bis 2008 isch si Bresidänti vum Bund vu dr Sälbschtändige z Bade-Wirttebärg gsii un vu 2006 bis aafangs 2008 au Bresidänti vum Bundesverband vu dr Sälbschtändige-Dytsche Gwärbverband e. V. (BDS).

Bolitischi Karriere

D Dorothea Störr-Ritter isch anne 1994 in d CDU yydrätte. Anne 1995 isch si Mitglid im CDU-Kraisvorstand Ämmedinge wore, vu 1997 bis 1999 isch si dert stellverdrättendi CDU-Kraisvorsitzeri gsii. Vu Mai 2001 bis 2003 isch si Vorsitzeri vum CDU-Kraisverband Löörech un vu 2002 bis 2005 Landesgschäftsfiereri vu dr CDU Bade-Wirttebärg gsii. Bi dr Bundesdagswahle 1998, 2002 un 2005 isch si as Diräktkandidati im Bundesdagswahlkrais Löörech – Mille dr SPD-Kandidati Marion Caspers-Merk unterläge, isch aber 1998 iber d Landeslischt vu dr CDU Bade-Wirttebärg in Dytsche Bundesdag yyzoge. Bi dr Bundesdagswahl 2002 isch si nit widergwehlt wore, het aber as Nooruggeri fir dr Abgordnete Heinz Seiffert ab em 18. Juli 2005 fir e baar Wuche em em Bundesdag aaghert. Wäg dr Iberhangmandat vu dr CDU Bade-Wirttebärg het si bi dr Bundesdagswahl 2005 iri Widerwahl verfählt.

Am 17. Dezämber 2007 isch si vum Kraisdag vum Landkrais Brysgau-Hochschwarzwald mit 57 vu 66 Stimme as Noofolgeri vum Jochen Glaeser zur Landreeti gwehlt wore. Si isch bi irem Amtsaadritt am 3. Merz 2008 di erscht Landreeti z Bade-Wirttebärg gsii. Im Dezämber 2015 isch si fir e zwooti Amtszyt widergwehlt wore.

Syt em 12. Oktober 2011 isch si Mitglid im Nazionale Normekontrollroot.

Familie

D Dorothea Störr-Ritter isch ghyrote mit em Hans Ritter un het zwoo Dechtere.

Weblink

• Biografy im Abgordnetehandbuech vu dr 14. Wahlperiod vum Dytsche Bundesdag
• Biographie beim Deutschen Bundestag

Fueßnote

Dä Artikel basiert uff ere fräie Übersetzig vu dere Version vum Artikel „Dorothea_Störr-Ritter“ vu de dütsche Wikipedia. E Liste vu de Autore un Versione isch do z finde.