Die Tat

Dä Artikel behandlet e ehemolegi Schwizer Zitig. Witeri Bedüdige findt me do.

Die Tat isch e sozial-liberali Schwizer Zitig gsi, wo vo 1935 bis 1978 vo der Migros usegä worde isch, zersch as Wuchezitig, denn as Tageszeitung, wo am Obe erschint, und schliesslech as Boulevardzitig, wo am Morge erschint.

D Tat isch vom Gründer vo der Migros, em Gottlieb Duttweiler, is Läbe gruefe worde. Während d Wuchezitig s Parteiorgan vom Landesring vo de Unabhängige gsi isch, het sech d Obezitig schnäll vo dere Partei emanzipiert und isch höch Agseh worde au im Usland, bsunders wäg ihrer Wuchenändbilag Die literarische Tat wo vom Max Rychner und em Erwin Jaeckle gleitet worde isch und wo vili verschidnigi Journalischde mitgwirkd hei. Wos ir Schwiz mit der politische Präss bärgab gange isch i de sibzger Jahr, und wil d Inserat-Inahme abgno hei wäg der Nöchi zur Migros, isch d Obezitig Ändi Merz 1977 igschdellt worde. Der damaligi Presidänt vo der Migros, dr Pierre Arnold, het probiert, d Zitig as Boulevardzeitig witerzfüere. Ire wirtschaftskritische, scharfe Schdil hei ne aber nach 16 Mönet bewoge, dr Chefredakter Roger Schawinski z entlo. A sire Schdell hed er, ohni d Redaktion z froge, dr Karl Vögeli igsetzt, wo e gmässigtere Kurs vom Blatt hät sötte garantiere. Dr Proteschschdreik wod Redaktion drufabe gmacht het, het de bewirkt, dass d Boulevardzitig Ändi Septämber 1978, nume einehalb Jahr nach ihrer Ifüerig, igschdelt worde isch.

Dä Artikel basiert uff ere fräie Übersetzig vu dere Version vum Artikel „Die_Tat_(Schweizer_Zeitung)“ vu de dütsche Wikipedia. E Liste vu de Autore un Versione isch do z finde.