Diccionari de la llengua catalana

es Bild vom Umschlag vom Wörterbuech

S Diccionari de la llengua catalana, abkürzt DIEC, isch s Wörterbuech vom Katalanisch. S Wäärch isch eisproochig, es erkläärt also d Wörter i dr glyche Sprooch.

Es isch es Projäkt vom Inschtitut für katalanischi Forschig, em Institut d’Estudis Catalans IEC z Barcelona, und me luegt s als s Standardwörterbuech vo dere Sprooch vo Kataloonie, däm Land im nordöschtliche Spanien a. Mit däm Wäärch het men en äinhäitlichi Schriftsprooch für s Katalanisch ygfüert.

Es isch dr Filoloog Pompeu Fabra i Poch (1868–1948) gsi, wo drmit für die lexikografischi Abtäilig vom IEC im Joor 1928 agfange het. Dr Schwiizer Romanischt Louis Gauchat isch au Mitgliid vom IEC woorde und het em Pompeu Fabra i Poch mit sinere Erfaarig mit em Wälschschwiizer Mundartwörtebuech Glossaire des patois de la Suisse romande ghulfe. Vier Joor spööter isch die eerscht Fassig vom Wörterbuech mit em Titel Diccionari General de la Llengua Catalana (DGLC), katalanisch für «Allgemeines Wörterbuch der katalanischen Sprache», usecho.

Sit 1954 het me s DGLC als offiziells katalanischs Wörterbuech chönne bruuche. I de 1980er Joore isch bi de Schriftsteller d Idee ufchoo, s Lexikon sött nöi gmacht wärde und die ganzi modärni Sprooch zäige. 1995 isch s komplet nöi bearbeitete Wörteerbuech s erschte Mol und anne 2007 die zwöite Usgab drvo, s DIEC2, usecho. Me cha drin vo mee weder 130'000 Wörter vo dr aktuelle Sprooch, au vo nöie technische Wörter, öppis lääse.