Das Paradies der Frauen
| Wärkdaate | |
|---|---|
| Originalditel: | Das Paradies der Frauen |
| Form: | Revue-Operedde |
| Originalsprooch: | Deutsch |
| Muusig: | Paul Burkard |
| Libretto: | Eduard Rogati |
| Uruffüerig: | 1938 |
| Ort vo dr Uruffüerig: | Stettin |
| Ort und Zit vo dr Handlig: | Chicago ond Coraya en de 30-er Jôhr vom 20. Jôhrhondert |
| Dialäkt: Schwäbisch |
Das Paradies der Frauen (bei dr Urauffihrong hôt des Werk noh Die Frauen von Coraya ghoißa) ischt a Revue-Operedde en drei Uffziig mit dr Musik vom Schweizer Kombonischda Paul Burkhard. S Libreddo stammt vom Eduard Rogati. S erscht Môl uff d Bihne komma isch des Sengschbiil em Jôhr 1938 z Stettin.
D Persona vo dr Handlong send
[ändere | Quälltäxt bearbeite]- D Viola Parker (Sopran)
- Dr John Parker, dera ihr Môô, a Forschongsreisender (Tenor)
- D Peggy Hill, dr Viola ihr Freindin (Subredde)
- Dr Kolumbus John, em John sei Freind ond Reisebegleider, a Reporder (Tenorbuffo)
- D Pamela Self, dr Viola ihr Muader (a sengenda Schauschbiilere)
- Dr Kabideen Slips, Präsident vom Herraklub (a Komiker, wo au a bissle senga kôô)
- Drei Dama (Sopran, Mezzosopran ond Alt)
- A Grubbe vo drei Herra (zwoi Teneer ond oin Bass)
- A Grubbe vo viir Herra (zwoi Teneer ond zwoi Bäss)
- D Maja, a jonga Insulanere (Schbrechroll)
- Dr Direktr Perkins, em Kolumbus John sei Chef (Schbrechroll)
- Hochzeitsgsellschaft, Klubmitgliider, Insulanerinna (Chor ond Schdadischda)
Firs Orkeschtr braucht mr
[ändere | Quälltäxt bearbeite]Zwoi Fleeda, a Oboe, zwoi Klarinedda, a Fagott, viir Herner, drei Trombeeda, zwoi Posauna, a Harf, a Klaviir, a Banjo, a grauß Schlagwerk ond Streicher.
Handlong
[ändere | Quälltäxt bearbeite]Ort, Zeit ond Bihnabilder
[ändere | Quälltäxt bearbeite]Dui Operedde schbiilt en dr US-amerikanischa Stadt Chicago ond uff dr fiktiva Sidseeinsel Coraya zo dera Zeit, wo des Werk sei Urauffihrong erleabt hôt, also gega Ende vo de 30er-Jôhr vom 20. Jôhrhondert.
Erschtr bis Driddr Uffzug
[ändere | Quälltäxt bearbeite]Em-ma vornehma Hotel z Chicago feiret dr bekannde Forschongsreisende John Parker Hochzeit mit seira Braut Viola ond ama Haufa gladene Gäscht. Fir d Viola isch des scho de zwoid Ehe, au wenn-se dô drvoo eidrenglich vo ihrer Muader gwarnt wôrra ischt. Oiner vo de Gäscht schbiilt Zuafall ond sorgt drfir, dass d Viola an Briaf en d Hend kriagt, wo ôôgeablich vo ihrem Môô gschriiba wôrra ischt. Dô draus erfehrt-se, dass der a erodischs Abenteier mit-ra Sidsee-Scheenheit ghet hôt. Kaum hôt-se sellen Briaf gleasa, packt-se dr Zorn. Ohne mit ihrem Môô a Ausschbrôch zo suacha, haut-se oifach ab.
Uff dr Sidseeinsel Coraya grindet d Viola – zamma mit andre Ehefraua, wo a gleichs Schicksal erlidda hend – an Weiberstaat, s Paradies der Frauen. Ondrdessa send abr au deane ihre Manna en dr Hoimet et ootädich bliiba. Deet hend-se kurzerhand an Klub der Verlassenen grendet. Wia sich nô bei sellem Vorei dui Nôchricht vom Paradies der Frauen vrbroidet, fasset dia Klubmitgliider da Entschluss, nôch Coraya zo fahra ond ihre Fraua hoimzohola.
A-ma scheena Dag lauft em Hafa vo Coraya a Schiff ei. Neigiirig eilet dia Fraua herbei ond staunet et schleacht, wia ihre Manna an Land kommet. Kurz druff daucht au noh a Flugzeig auf. Dô dren sitzt dr Forschongsreisende John Parker. Der hôt vo dr amerikanischa Regiirong da Ufftrag kriagt, dera nuia Republik d Unabhängichkeitsurkunde zo ibrbrenga. S dauret et lang, bis-es deane frisch gebackene Insulanerinna demmret, dass uff sellra Insel ohne s mennliche Gschlecht koine paradiisische Zuastend herrschet. Mit-ra graußa Vrsehnongsfeier endet des Werk.
Quella
[ändere | Quälltäxt bearbeite]- Hellmuth Steger / Karl Howe: Operettenführer, Fischer Bücherei Frankfurt am Main, erschda Ufflag vo 1958
- Lueg da Weblink