Dünndarm

Us der alemannische Wikipedia, der freie Dialäkt-Enzyklopedy
Dr Verdauigsapparat vom Mensch

Dr Dünndarm (lat. Intestinum tenue) isch dä Däil vom menschlige Verdauigsdrakt, wo zwüschen em Magen und em Dickdarm lit. Dr Dünndarm isch dr lengsti Däil vom Verdauigsdrakt.

Anatomii[ändere | Quälltäxt bearbeite]

Mä däilt dr Dünndarm in drei Däil ii:

Zäichnerischi Daarstellig vo dr Buuchhööli (Topographii). Mä gseet dr Colonraame und d Dünndarmschlaufe wo uf die linggi Site verschoobe si.
D Pankreas und dr Zwölffingerdarm. D Gallegäng und d Papille si freibrepariert und lige dorsal, das häisst hinder de anatomische Strukture wo im Bild oobedraa daargstellt si.

In dr Viszeralchirurgii wärde mäistens nume dr Leer- und dr Chrummdarm zum Dünndarm zelt.[1] In dr Anatomii wärde die bäide Darmabschnitt au als Intestinum tenue mesenteriale (Dünndarm mit Krös) zämmegfasst.

Zum Naarigsbestanddäil guet chönne resorbiere, isch die inneri Oberflechi dur Falte (Kerckring-Falte, au Plicae circulares), Zotte und Mikrovilli enorm vergröösseret. D Falte eläi vergröössere d Oberflechi scho um s Dreifache, d Zotte um e zuesätzlige Faktor vo 7 bis 14, und d Mikrovilli non emol 15 bis 40fach. Dorum het dr Dünndarm schliesslig e Resorpzionsoberflechi vo öbbe 180 m². Zwüsche de Zotte lige d Krüpte vom Dünndarm (Glandulae intestinales), wo d Oberflechi no gröösser mache aber au für d Sekrezion do si.

Bsundrigs am Zwölffingerdarm si d Brunner-Drüese (Glandulae duodenales). Si lige in dr Tela submucosa, dr Wand vom Duodenum, und schäide Muzin, e Trypsinaktivator, und Hüdrogencarbonat ab (zum dr suur Magesaft z nöitralisiere).

Arteriell wird dr Dünndarm zum grösste Däil vo dr Arteria mesenterica superior (u. a. über Arteriae jejunales und Arteriae ileales) versorgt; nume dr Abschnitt vom Duodenum kranial (uf e Chopf zue) vom Mesocolon transversum wird vo dr Arteria pancreaticoduodenalis (über Truncus coeliacus und denn Arteria hepatica communis) versorgt.

Dr wenösi Abfluss bassiert vollständig über d Pfortaadere in d Lääbere.

Dr Dünndarm wird parasympathisch (vo de Nervi vagales us) und sympathisch über e Plexus aorticus abdominalis innerviert.

Dr Lümfe fliesst vollständig über d unbaari Truncus intestinalis ab. Vo dört chunnt si in d Cisterna chyli und den Ductus thoracicus (Milchbrustgang). D Lümfe dransportiert d Lipid (d Fett), wo im Darm resorbiert wärde, in dr lingg Wenewinkel, vo dört gönge sie über die rächti Härzhelfti zerst in d Lunge, wo si für d Sünthese vo de Surfactants nützlig si.

Litratuur[ändere | Quälltäxt bearbeite]

  • Franz-Viktor Salomon: Darm, Intestinum (Enteron). In: Salomon u. a. (Hrsg.): Anatomie für die Tiermedizin. Enke-Verlag Stuttgart, 2. erw. Aufl. 2008, S. 293–311, ISBN 978-3-8304-1075-1
  • Giulia Enders; Jill Enders (Illustrazione): Darm mit Charme. Alles über ein unterschätztes Organ. Ullstein, Berlin 2014, ISBN 978-3-550-08041-8 (Taschenbuch) / ISBN 978-3-550-08108-8 (gebunden).

Weblingg[ändere | Quälltäxt bearbeite]

 Commons: Verdauigsdrakt – Sammlig vo Multimediadateie

Fuessnoote[ändere | Quälltäxt bearbeite]

  1. Kuno Weise (Hrsg.): Chirurgie: Schnitt für Schnitt. Georg Thieme Verlag 2004, ISBN 978-3-13-130841-2, S. 582.
Gsundheitshiwiis Bitte tue de Hiwiis zu Gsundheitsthemene biachte!