Brutalismus

Us der alemannische Wikipedia, der freie Dialäkt-Enzyklopedy
D Ussemuure vo dr Sakristei vo Sainte-Marie de la Tourette - e charakteristischs Bischbil vom brutalistische Stiil: Sichtbeton und äifachi geometrischi Forme

Dr Brutalismus isch e Stil in dr Archidektuur vo dr Modärne, wo d Blüetezit von em zwüsche 1953 und 1967 gsi isch.[1]

Grundlaage[ändere | Quälltäxt bearbeite]

Dr Begriff isch um 1950 vom schwedische Archidekt Hans Asplund brägt worde. Er läitet sich ab vom franzöösische Usdrugg béton brut, wörtlig ‚Roobeton‘. Gmäint isch s sichtbare Baumaterial, vor allem dr Formbeton mit sine Unebehäite und de Abdrück vo dr Schaalig, aber au Metall, Ziegel und anderi Materialie. Charakteristisch für d Archidektur si räini geometrischi Körper, wo nit mit ere Formsprooch kaschiert wärde, wo sich an anderi formali Löösige aaleene. Bsundrigs d Archidektur vom Le Corbusier, vor allem s Chloster Sainte-Marie de la Tourette bi Éveux-sur-l’Arbresle und d Unité d'Habitation z Marseille, Firminy, Berlin und Nantes, si für e Brutalismus richdigswiisend gsi.

As erste brutalistische Bau gältet d Schuel in Hunstanton vom Alison und Peter Smithson (1949–1954). Dr Brutalismus het die internazionali Modärne vo dr Nochchriegszit abglööst und mit sine Tendänze vo plastisch-körperhafte und konstrukzionsorientierte Archidektur, wo vo grobe Forme brägt gsi isch, und zum Baue mit Fertidäil gfüert, wo in de 1960er und 1970er Joor vorgherrscht het.

Dr Brutalismus (Architekturstil) und dr änglischi New Brutalism (unter anderem Archidektur- und Städtebau-Theorii) si zwäi verschidnigi Ströömige. Dr New Brutalism vo de änglische Mitgliider vom Team 10, Alison und Peter Smithson, het mee mit dr theoretische Reform vo dr CIAM (in Archidektur und Städtebau) z due as mit em Begriff Béton brut.[2][3]

Galerii[ändere | Quälltäxt bearbeite]

Litratuur[ändere | Quälltäxt bearbeite]

  • Jürgen Joedicke: Architekturgeschichte des 20. Jahrhunderts. Stuttgart / Züüri 1998, S. 82–95.
  • Klaus Göbel, Konrad Gatz: Ziegelkonstruktionen im Hochbau. Münche 1969.
  • Reyner Banham: Brutalismus in der Architektur. Ethik oder Ästhetik? Stuttgart 1966.

Weblingg[ändere | Quälltäxt bearbeite]

Fuessnoote[ändere | Quälltäxt bearbeite]

  1. „Brutalismus“ Archivlink (Memento vom 1. Novämber 2010 im Internet Archive) uf wissen.de vom Wissen Media Verlag, abgrüeft am 8. Mai 2010
  2. Dr Archidekturhistoriker Reyner Banham het dä Underschiid im Ditel vo sim Buech: Brutalismus in der Architektur – Ethik oder Ästhetik? formuliert (ängl.: The New Brutalism – Ethic or Aesthetic?)
  3. The New Brutalism Brutalismus in Großbritannien