Bregl da Heida

Muurräschte vo dr Chilche

Uf em Hügel Bregl da Heida i de Bündner Gmaind Sagens isch im früene Middelalter es chlyses Dorf mit ere Chilche und anderne Hüüser gstande. Der Platz liit 300 Meter im Oschte vom Dorf Sagens über em töife Tobel vom Mülibach. Noch drby liit d Ruiine vo de Burg Schidbärg.

Vo dr alte Chilche, wo en karolingischi Saalchilche mit einere Apsis gsi isch, sind nur no d Grundmuure z gsee. Vo 1965 bis 1967 het me se uusgrabe.

Es isch d Chilche, wo ane 765 i der Urkunde vom Bischof Tello vo Chur vorchunt, wo Teschtamänt vom Bischof Tello heisst. Dr Bischof het den s Dorf Sagens mit der Burg und vil Güeter bi dr Chilche em Chloschter Disentis gschänkt. I dr Urkund stoot, ass d Chilche s Patrozinium vom Häilige Columban gha het.

Dr rätoromanisch Name bregl goot worschins ufs vorromanische Ursprungswort brogilos zrugg, wo es Gländ mit Wald oder Gstrüpp bezeichnet. Das Wort chunt i karolingische Dokumänt vor, hüt gäb s es nur no in Fluernäme. Do drmit würd bregl da heida uf Dütsch also öpe Heide-Gstrüüch bedüte, was zu so mene Platz mit alte, vo Pflanze überwuecherete Ruiine würd basse.

Literatur

• Martin Bundi, Urs Clavadetscher, Werner Meyer, Wolfram Kuoni: Schiedberg, Bregl da Heida und Schloss Aspermont in Sagogn. Bern 2007.

Weblink

 Commons: Bregl da Haida – Sammlig vo Multimediadateie

• Bregl da Heida uf sagogn.ch

Fuessnoote

46.7922259.263372