Bernardo Pasquini

Us der alemannische Wikipedia, der freie Dialäkt-Enzyklopedy
Dr Bernardo Pasquini

Dr Bernardo Pasquini (* 8. Dezämber 1637 z Massa in Val di Nievole, (Toskana); † 22. Novämber 1710 z Rom) isch en italiänische Organist, Dschembalist, Kapällmäister und Komponist im Barock gsi.

Lääbe[ändere | Quälltäxt bearbeite]

Dr Bernardo Pasquini het si erst Muusigunderricht vom Mariotto Bocciantini überchoo. Vo 1650 aa het er z Ferrara bim ene Unggle gwoont, wo Briester gsi isch, und het witer Muusig gleert. Vom Aafang vo 1654 bis zum Novämber 1655 isch er Organist an dr „Accademia della morte“ z Ferrara gsi. Denn isch er uf Rom züüglet, und isch e Schüeler vom Marc'Antonio Cesti und vom Loreto Vittori worde. Vo 1667 aa het er für e Fürst Giovan Battista Borghese, Principe di Sulmona, gschafft und vo 1691 aa für däm si Soon. Spööter isch er Organist an verschiidene römische Chille gsi, under anderem an dr Santa Maria Maggiore (1665 bis 1667). 1664 isch er mit em Kardinal Flavio Chigi uf Frankriich gange.

Dr Pasquini het für e Hufe Mitgliider vom römische Hoochadel komponiert, drunder für d Königin Christina vo Schweede. Er isch e beliebte Dschembalist und Leerer gsi und isch vil vo bedütende Aadelshüüser anggaschiert worde.

Wo dr Alessandro Scarlatti zum zwäite Mol z Rom gsi isch (1703 bis 1708) het är und dr Arcangelo Corelli vilmol an Uffüerige mit em Scarlatti zämmegschafft, bsundrigs im Zämmehang mit dr Accademia degli Arcadi, wo alli drei Mitgliid gsi si. Dr Pasquini het au für s Oratorium Santissimo Crocifisso gschafft.

Zu sine Schüeler häi dr Giovanni Maria Casini, Giuseppe Fabbrini, Francesco Gasparini, Johann Philipp Krieger und dr Georg Muffat ghöört.

Dr Pasquini het e baar bedütendi Wärk für Dasteninstrumänt uusegee, drunder Toccate, Suite und Partite. Er isch dr Erst z Italie gsi, wo Suite komponiert het, und het die Gattig in sinere Häimet bekannt gmacht. Er het e Hufe Vokalwärk vo verschidnige Arte komponiert und 14 Opere, wo zu sinere Zit seer erfolgriich gsi si.[1]

Weblingg[ändere | Quälltäxt bearbeite]

Fuessnoote[ändere | Quälltäxt bearbeite]

  1. Ardikel im Riemanns Musiklexikon 1961
Dä Artikel basiert uff ere fräie Übersetzig vum Artikel „Bernardo_Pasquini“ vu de dütsche Wikipedia. E Liste vu de Autore un Versione isch do z finde.