Benedikt La Roche
| Dialäkt: Baseldütsch |
Dr Benedikt La Roche (au La Roche-Stäächeli; * 26. Juli 1802 z Baasel, † 6. Dezämber 1876 z Baasel) isch e Schwizerer Bankiee und Politiker gsi. Er isch vor allem bekannt worde, won er 1848/49 dr erst äidgenössich Generalbostdiräkter gsi isch.
Lääbe und Karriere
[ändere | Quälltäxt bearbeite]Dr Benedikt La Roche isch dr Soon vom Bankiee Johann Jakob La Roche (1774–1856) und dr Anna Katharina (1778–1828), dr Dochder vom Siidebandfabrikant und Rootsher Peter Vischer, gsi. Er het 1824 d Dorothea Stäächeli (1806–1868) ghürootet und 1874 in zwäiter Ee d Anna Maria Briiswärk (1817–1885), d Witwe vom Bandfabrikant Wilhelm Buurged. Chinder het er käni ghaa.[1]
Dr La Roche hetl en Usbildig zum Kaufmaa gmacht, zerst z Baasel und 1821 in Le Havre. Zwäi Joor spööter het er d Prokura im Bank- und Spedizioonsundernääme vo dr Familie überchoo.Vo 1840 aa het er d Firma zsämme mit sim Brueder Carl Gustav (1813–1873) gläitet. Vo 1832 bis 1840 isch er Mitgliid vo dr Baasler Kaufhuus- und bis 1850 vo dr Handligskommissioon gsi. Vo 1831 bis 1837 isch dr La Roche Ooberlütnant vo dr Baasler Kawallerii gsi, won er denn bis 1842 reorganisiert het. Er isch 1840/41 Mitgliid vom Baasler Milidäärkollegium gsi und isch 1848 Aidemajor vo dr Baasler Bürgergarde worde.[2]
Dr La Roche isch vo 1846 bis 1866 Mitgliid vom baaselstedtische Groosse Root gsi und vo 1853 bis 1858 vom Chläine Root und vom Staatskollegium. Sit 1833 her er sich as Verdräter vo dr Bürgerschaft in dr Baasler Bostkommissioon für s Baasler Bostwääse iigsetzt und spööter für s äidgenössiche. Er het mitschafft am Abschluss vom ene Bostverdrag mit Frankriich im Joor 1846. Im Joor druf het er en äidgenössichi Delegazioon gläitet, wo mit Ööstriich günstigeri Bedingige bi Dransitgebüüre und e Halbierig vo de ööstriichische Brieftaxe usghandlet het. Wägen em Sonderbundchrieg und dr Gründig vom schwizerische Bundesstaat isch dä Verdraag nie rächtswirksam worde.[2]
Dr Benedikt La Roche isch am 30. Novämber 1848 zum erste Generalbostdiräkder vo dr äidgenössiche Bost gweelt worde. Er het drei Bostgsetz duuregsetzt, wo d Postregal, d Organisazioon vo dr Verwaltig und d Sänkig vo de Bosttaxe greeglet häi. Sini Vorschleeg zun ere witere Verwaltigsreform si vo sim Vorgsetzte Wilhelm Matthias Naeff nid understützt worde. Dr La Roche het am 19. Juli 1849 demissioniert, isch aber no im gliiche Joor vom Bundesroot zum Kommissäär zur Reegelig vo de Bostverdrääg ernennt worde. Er het denn mit Belgie, de Niiderland, Frankriich, Spanie und de dütsche Staate Pröisse, Baade, Württebäärg, Saggse und Bayre Abkomme über e Bostvercheer abgschlosse. Im April 1851 isch er noch eme Strit mit em Bundesroot, wil er en Orde vom Königriich Sardinie, ändgültig zruggdrätte. S Amt vom Generalbostdiräkder isch denn bis in d 1870er Joor umbsetzt bliibe.[1][2]
Im Februar 1853 het dr La Roche zu de Mitgründer vo dr Schwizerische Zentralbaan (S.C.B.) ghöört[2] und isch im Novämber zum Bresidänt vo dr staatlige Iisebaankommissioon gweelt worde. Zää Joor spööter het er zu de Gründer vo dr Baseler Handelsbank (1945 zum Schweizerischen Bankverein (SBV/UBS)) ghöört. Im Joor 1866 het er sini öffentlige Ämter ufgee und sich ins Brivaatlääbe zruggzooge.[1]
Liddratuur
[ändere | Quälltäxt bearbeite]- Hans Rudolf Schmid: La Roche, Benedict. In: Neue Deutsche Biographie (NDB). Band 13, Duncker & Humblot, Berlin 1982, ISBN 3-428-00194-X, S. 638 f.
- Thomas Schibler: Benedikt La Roche. In: Historisches Lexikon vo dr Schwiiz. 13. November 2008.
- Thomas Schibler: La Roche (Familie). In: Historisches Lexikon vo dr Schwiiz. Stand: 2018.
Fuessnoote
[ändere | Quälltäxt bearbeite]- ↑ 1,0 1,1 1,2 Hans Rudolf Schmid: La Roche, Benedict. In: Neue Deutsche Biographie (NDB).
- ↑ 2,0 2,1 2,2 2,3 Thomas Schibler: Benedikt La Roche. In: Historisches Lexikon der Schweiz (HLS).
|
Dä Artikel basiert uff ere fräie Übersetzig vum Artikel „Benedikt_La_Roche“ vu de dütsche Wikipedia. E Liste vu de Autore un Versione isch do z finde. |