Basler Marionettentheater

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dialäkt: Baseldütsch

S Basler Marionettetheater, churz BMT, isch e Chlaitheater im Zähntechäller im Geböid vo dr Allgemäine Lääsigsellschaft Baasel am Münsterblatz 8 in dr Stadt Basel.

S Theater[ändere | Quälltäxt bearbeite]

Dr Richard "Ricco" Koelner (1904-1993) und si Frau Käthi häi 1943 s Basler Marionette Theater gründet und 1947 dr "Trägerverein Gesellschaft Basler Marionettentheater". Dr Koelner het sich as Autodidakt alles sälber biibrocht, was sone Marionettetheater brucht und het nid nume bis 1983 s Theater elläi gläitet, sondern au no as Figure- und Büünibildner, Dramaturg, Autor und Reschissöör gschafft.

Am 27. Merz 1944 het s Theater in dr Kunsthalle si erste Uffüerig gee: Dr Faust vom Karl Simrock. Es het nume Schauspiil und Opere für Erwaggseni uf d Büüni brocht bis es 1951 s erste baseldütsche Stügg für Kinder inszeniert het: D Mondladärne vom Ricco Koelner.

S Basler Marionettetheater het in alle mööglige Sääl gspiilt, bis es 1956 im Zähntechäller e Häim gfunde het.[1] Es wird vo dr «Gesellschaft des Basler Marionettentheaters» drait. Es het e vilfältigs Brogram: Neuinszenierige und BMT-klassiker, Gastspiil, Adväntsveraastaltige und anders. Für Erwaggsnigi git s Stück wie Ubu Roi, Die Dreigroschenoper vom Bertolt Brecht, im Peter Jahns und dr Sabine Fromm ihr Das Küssen macht so gut wie kein Geräusch oder Kleine Eheverbrechen, wo an vile Theater und au im Färnseh zeigt worden isch, währed s Brogramm für die ganzi Familie im Michael Ende si S Traumfrässerli, Das kleine Ich bin ich vo dr Mira Lobe und dr Susi Weigel und Märlibearbeitige wie im Hauff sini Gschichte Das kalte Herz, Der kleine Muck, Zwerg Nase und e Hufe anderi Stück umfasst.

S Lokal[ändere | Quälltäxt bearbeite]

Dr Zähntechäller am Münsterblatz isch im 16. Johrhundert baut worde, und het e gotischs Chrüzgwölb us Sandstei. Er lit grad über em Rhii und mä het e schöni Ussicht vo dört. Si Name chunnt drvoo, ass er e Zitlang brucht worde isch, zum dr Chillezähnt din z lagere. 1955/56 isch dr Chäller zum Theater umbaut worde.

Kwelle[ändere | Quälltäxt bearbeite]

Fuessnoote[ändere | Quälltäxt bearbeite]

  1. Susann Moser-Ehinger, Hansueli W. Moser-Ehinger: Bhaltis: Wenn die Sonne tief steht, werfen sogar wir lange Schatten, BoD – Books on Demand, 2013

47.556897.592208Koordinaten: 47° 33′ 25″ N, 7° 35′ 32″ O; CH1903: 611560 / 267364