Die keltischi Siidlig Baasel-Gaasfabrik

Us der alemannische Wikipedia, der freie Dialäkt-Enzyklopedy

Koordinate: 47° 34′ 20″ N, 7° 34′ 54″ O; CH1903: 610759 / 269072

D Rauriker Siidlige im Gebiet vo dr hütige Stadt Basel im erste Johrhundert vor dr Ziitwändi.
Dialäkt: Baseldütsch

Baasel-Gaasfabrik isch dr Naame, wo mä ere bedütende keltische Groosssiidlig us dr spoote Latèneziit im Norde vo Baasel gee het.

Dr Naame vo dr Siidlig chunnt vo dr domoolige Baasler Gaasfabrik an dr Voltastrooss, wo mä 1911 d Siidlig uf em Areal von ere entdeggt het. D Iiwooner si keltischi Rauriker gsi, d Siidlig isch vo öbbe 150 bis 80 v. d. Z. bewoont gsi und het e Flechi vo 150'000 m² ghaa. Meereri Färnhandelswääg si doo zämmedroffe, und Waare si vo so wit wie us em Middelmeerruum importiert worde. Au Gäld het mä in gröössere Mänge gfunde, es isch äine vo de grösste Fünd vo keltische Münze gsi.

D Hüüser si us Holz und Leem baut gsi. Mä het Überräst vo Pföste gfunde und gstampfti Leembööde. D Richdig vo de Hüüser isch äihäitlig gsi und mä nimmt dorum aa, ass d Siidlig blaant worde isch. Es isch au die ersti Siidlig in dr Region gsi, wo e Zentrum ghaa het, wo Handel und Handwärk driibe worde si, und en Umfäld mit eme büürlige Charakter. D Parzellierig isch groosszüügig gsi und mä dänggt, ass d Grääbe, wo mä gfunde het, d Gränze vo de Parzälle gsi si. D Stroosse si öbbe in rächte Winggel zunenander verloffe. Wichdigi Fünd si die öbbe fümfhundert Gruebe gsi, wo zerst as Chäller, Silo für Gedräid und oder Wärkstett brucht worde si und wo mä denn spööter mit Abfall ufgfüllt het. Was mä dört gfunde het cha erklääre, wie s daagdääglige Lääbe vo de Kelte usgsee het.

Mä het zwäi Friidhööf gfunde, aber Dooti si e chli überall im Gebiet vo dr Siidlig begraabe worde.

D Laag vo dr Siidlig[ändere | Quälltäxt bearbeite]

Basel-Gasfabrik lit uf dr lingge Site vom Rhii und het käini Verdäidigungsaalaage gha. Mä vermuetet, ass dr Ort uuseglääse worde isch, wil sich dört e «Sunne-» und e «Mondlinie» schniide, wo die äint dr Blaue im Jura mit em badische Blaue verbindet und die anderi dr Belche im Jura mit em Chliine Belche, em Petit Ballon im Elsass.[1]

D Rauriker häi Baasel-Gaasfabrik woorschinlig im Joor 58 v. d. Z. ufgee, wo d Kelte uf Gallie zooge si. Noch dr Niiderlaag in dr Schlacht bi Bibracte si si in iir ursprüngligs Siidligsgebiet zruggzooge und häi uf em Münsterhüügel e befestigts Oppidum gründet.

Kwelle[ändere | Quälltäxt bearbeite]

Fuessnoote[ändere | Quälltäxt bearbeite]

  1. Carl Fingerhuth: Die Gestalt der postmodernen Stadt, vdf Hochschulverlag AG, 1997, S. 77