Baloise Park

47.548897897.59231253Koordinate: 47° 32′ 56″ N, 7° 35′ 32,3″ O; CH1903: 611570 / 266476

Dr Baloise Park isch en Areal z Baasel mit drei Geböid, wo d Versicherigsgrubbe Bâloise iire Sitz het. Zwüschen em Aeschegraabe, em Parkwääg und dr Nauestrooss, nördlig vom Baanhoof Baasel SBB zwüsche dr Elisabethenaalaag und em BIZ-Durm, gits en offeni Aarbets- und Beweagigszoone für d Mitarbäiter vo dr Bâloise, Drittmieter und d Bevölkerig. Im Baloise Park hets 1300 Büroaarbetsblätz, vo dene brucht d Bâloise sälber öbbe 700. Dr Räst wird vermietet. Im Novämber 2015 si d Geböid, wo vorane dert gstande sin, drunder d Verwaltigsgeböid vo de Baasler Versichrige und s ehemoolige Hotel Hilton Baasel, abgrisse worde. Am 15. Juni 2017 isch dr Grundstäi für s erste nöije Geböid im Baloise Park gläit und am 21. Septämber 2020 isch dr Park eröffnet worde.^[1]^[2]

S Usbildigszentrum[ändere | Quälltäxt bearbeite]

Im 42 Meter hooche Bauwärk vom Valerio Olgiati, wo im Baufäld Ost e Bruttostockflechi vo 13'000 Kwadratmeter het, isch s Usbildigszentrum vo dr Versicherigsgrubbe.

S Baloise Hoochhuus[ändere | Quälltäxt bearbeite]

S höggste Bauwärk im Baloise Park isch s Baloise Hoochhuus im Weste, wo 89 Meter hooch isch. Es isch vo de Schwizer Archidekte Miller & Maranta entworfe worde. Es stoot am Aeschegraaben und wird zum grösste Däil as Hotel gnutzt.

Dr Hauptsitz[ändere | Quälltäxt bearbeite]

En achtstöckigs Geböid mit ere Hööchi vo 34 Meter vo Diener & Diener im Baufäld Süüd dient as Hauptsitz vo dr Bâloise Versicherig.

Litratuur[ändere | Quälltäxt bearbeite]

Bâloise (Uusegääber): Building the Baloise Park. Diener & Diener - August + Margrith Künzel - Miller & Maranta - Valerio Olgiati - Thomas Schütte - Matteo Thun. Christof Meriaa Verlaag, Baasel 2020, ISBN 978-3-85616-928-2