BSC Old Boys Basel

BSC Old Boys
	BSC Old Boys
Ganze Name	Basler Sportclub Old Boys
Ort	Baasel, Schwiz
Gründet	1894
Vereinsfarbe	gääl / schwarz
Stadion	Stadion Schützematte
Plätz	8000
Präsident	Beat Fläcklin
Trainer	Jonas Uebersax
Homepage	oldboys.ch
Liga	2. Liga interregional
2018/19	14. Blatz
	Heim ;
	Heim ;

Dialäkt: Aagglobaseldütsch

Dr Schwizer Sportklub BSC Old Boys Basel (OB) isch 1894 under em Naame F.C. Old Boys Basel gründet worde.

Sit em Aafang vom 20. Joorhundert het dr Klub BSC Old Boys Basel ghäisse. S BSC stoot für Basler Sportclub. Näben em Schutte het dr Veräin au en erfolgriichi Liichtathletik-Sekzioon.

1922 isch e Schwümmsekzioon gründet worde, wo sich spööter mit andere Baasler Veräin zum Schwümmveräin vo bäide Baasel zämmegschlosse het. Vo 1927 aa het mä im Veräin au Dennis gspiilt. 1935 het sich die Sekzioon as Dennis-Club Old Boys sälbständig gmacht und das isch dr hütig Häimklub vom Roger Federer.

S Stadion Schützematte z Baasel isch s Häimstadion vo de Old Boys. Ursprünglig häi si uf dr Margarethewiise gspiilt, aber wo d IWB, die Industrielle Wärk vo Baasel s Areal übernoo häi, het dr Klub sich e nöis Stadion müess sueche.

Vier Joor noch dr Gründig het e nöije Klub z Bärn dr Naame vo de Old Boys übernoo und e chli veränderet: dr BSC Young Boys isch aber hüte vil bekannter und erfolgriicher as d Old Boys Basel.

Gschicht und Naame

1876 het dr Durnleerer vo dr dozmolige Realschuel, dr Adolf Glaz, dr Realschüeler-Durnveräin gründet. 1893 het er s Schutte iigfüert. Vo denn aa häi sich im Summer und in de Herbstferie e baar Mitgliider vom Veräin reegelmäässig uf em Durnblatz bim Viadukt droffe zum Schutte. (Dä Durnblatz isch öbbe dört gsi, wo sich hüt dr Parkblatz vom Zolli befindet.) Am 10. Dezämber 1893 het denn uf em Landhof dr erst Schuttmatsch in Baasel stattgfunde zwüschen em Realschüeler-Durnveräin und em FC Basel, wo erst grad gründet worde isch und das Spiil 2:0 gwunne het.

Wo d Schüeler mit dr Schuel fertig gsi si, häi si nümme chönne Mitgliid vom Schüelerveräin si. Dorum häi si 1894 en äignige Schuttveräin gründet und hä em «Old Boys» gsäit, wil si z alt gsi si für e Schüelerberäin.^[1]

Erfolg im Schutte

Dr Veräin isch 1899, 1904 und 1912 Vize-Schwizer Mäister worde. 1932 isch er us dr Nazionaalliga A abgstiige. Denn het er joorelang in de undere Ligene gspiilt, bis er 1987 in d Nazionaalliga B ufgstiige isch. In dere Liga het vo 1988/89 bis 1993/94 au dr Lokalrival FC Basel gspiilt. D Old Boys si aber grad wider in die 1. Liga abgstiige. Sit 1995/96 spiile d Old Boys in dr 2. Liiga. 2006/07 si si in dr 2. Liga interregional gsi und denn im neggste Joor wider in dr 1. Liga. In dr Seson 2011/2012 häi si s gschafft, in die nöigründeti 1. Liga Promozioon ufzstiige.

Zum Veräin ghöre usser dr 1. Liga-Promozioons-Mannschaft Juniore-, Seniore- und Veterane-Mannschafte. D Nochwuggsmannschaft spiilt aktuell in dr 2. Liga. OB het au e Mannschaft in dr 4. Liga, und Daame und Mäitlitiim.

Usserdäm git dr Kwardierveräin au ere Mannschaft für Behindereti, em Dream Team, e sportligi Häimet und Möögligkäite zum Dreniere, wo 2009 vo dr UEFA uszäichnet worde si.

Dr BSC Old Boys anggaschiert sich in dr Noochwuggsaarbet und het immer wider usgezäichneti Spiiler ufzooge, wie dr Eren Derdiyok und Timm Klose wo spööter in dr Bundesliga und in dr Schwizer Nazionalmannschaft gspiilt häi.