Bärbl Mielich
| Dialäkt: Undermarkgreflerisch |
D Bärbl Mielich (* 22. Mai 1952 z Wuppertal) isch e dytschi Bolitikeri (Bindnis 90/Di Griene). Si isch vu 2006 bis 2021 Abgordneti im Landdag vu Bade-Wirttebärg gsii un vu 2016 bis 2021 Staatssekreteri im Minischterium fir Sozials un Integration.
Uusbildig un Beruef
[ändere | Quälltäxt bearbeite]Diplom-Sozialpädagogin Mielich isch z Bocholt/Westfalen uf s Gymnasium gange un het no dr Schuel e Lehr zur Erziehri gmacht. An dr Evangelische Fachhochschuel Düsseldorf Kaiserswerth het si derno Sozialpädagogik studiert. Derzue het si ne Zuesatzuusbildig zur Frauebeufdraiten un Familiemediatori gmacht. Si het e Lehrufdrag fir Supervision un Mediation an dr Katholische Fachhochschuel Friburg ghaa un dernäben as sälbschtständigi Familienmediatori gschafft.
Bolitischi Laufbahn
[ändere | Quälltäxt bearbeite]D Bärbl Mielich sich syter anne 1984 Mitglid bi dr Griene. Im Spotjohr 1987 isch si in dr Kraisdag vum Landkrais Brisgau-Hochschwarzwald noogruckt. Vum Jänner 1988 bis zue ihre Wahl in dr Landdag 2006 isch si dert Vorsitzeri vu dr griene Kraisdagsfraktion gsii.
Vu 1996 bis 2000 het si em Landesvorstand vu dr bade-wirttebärgische Grienen aaghert. Syter anne 2000 isch si Sprächeri vu dr Bundesarbetsgmainschaft vu dr Griene fir Arbet, Sozials un Gsundhait.
Bi dr Bundesdagswahle 1998 un 2002 isch si Kandidati vu dr Grienen im Wahlkrais Löörech – Mille gsii.
Bi dr Landdagswahl 2006 isch si iber s Zwaitmandat im Wahlkrais Brisgau in dr Landdag vu Bade-Wirttebärg gwehlt wore. Dert isch si gsundhaitsbolitischi Sprächeri vu ihre Fraktion un syt 2009 Mitglid im Fraktionsvorstand. D Mielich isch Mitglid im Petitionsuusschuss un vu 2011 bis 2016 Vorsitzeri vum Sozialuussyschuss gsii.
Bi dr Landdagswahl 2016 het si s Erschtmandat in irem Wahlkrais gwunne. Am 12. Mai 2016 isch si Staatssekreteri im Minischterium fir Sozials un Integration wore, was si bis zum Änd vu dr Legislaturperiod bliben isch.
Bi dr Landdagswahl 2021 het si nimi kandidiert.
Sunschtigs Engaschmänt
[ändere | Quälltäxt bearbeite]- Mitglid im Byrot vum Augennetz Südbaden
- Mitglid im Byrot vu dr Universitet Friburg
Persenligs
[ändere | Quälltäxt bearbeite]D Bärbl Mielich isch ghyrote un het drei Chinder. Si läbt z Pfaffewyler.
