Anne Will

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
d Anne Will bi me Talkufdritt im Novämber 2008

D Anne Will (* 18. Merz 1966 z Köln) isch e dytschi Färnseeschurnalischti. Vu 2001 bis 2007 het si d Nochrichtesändig Tagesthemen im Erschte moderiert, syt em Septämber 2007 laitet si di bolitisch Talkshow Anne Will vum NDR im Erschte.

Lääben un Uusbildig[ändere | Quälltäxt bearbeite]

D Anne Will isch as Dochter vun eme Architäkt un ere ehmolige Boschtaagstellte z Hürth ufgwachse. Si het en elötere Brueder. Noch em Abitur am Albert-Schweitzer-Gymnasium z Hürth het si an 1985 an dr Universitet Köln un dr Freie Universitet Berlin Gschicht, Bolitikwisseschaft un Anglischtik studiert. In dr Zyt vum Studium het si as Schurnalischti bi dr Kölnische Rundschau un em Spandauer Volksblatt gschafft un isch Stipendiati vu dr Friedrich-Ebert-Stiftig gsii.[1] Anne 1990 het si ihre Studium z Köln mit em Magischter abgschlosse.

ARD[ändere | Quälltäxt bearbeite]

d Anne Will

Noch em Studium het si bim Sender Freies Berlin gschafft un het dert vu 1991 bis 1992 e Volontariat im Herfunk un Färnsee gmacht. Ab Ändi 1992 het e greßere Zueschauerchrais d Will gchännt, wu si fir dr SFB d Talkshow Mal ehrlich un dr Sportpalast moderiert het. Vu 1996 bis 1998 isch si d Gaschtgeberi in dr Medieshow Parlazzo vum WDR gsii. Ab Novämber 1999 het si as erschti Frau d Sportschau bresäntiert, wu bis dert vu Manne dominiert gsii isch. Dodermit het si schnäll e groß Publikum gchännt. Anne Jahr 2000 het si fir d ARD Sportsändigfe vu dr Olympische Spiil vu Sydney bresäntiert.[2]

As Noofolgeri vu dr Gabi Bauer het d Will am 14. April 2001 ihri nei Ufgab as Moderatori vu dr Tagesthemen aadrätte, zerscht im Wächsel mit em Ulrich Wickert, ab Septämber 2006 mit däm sym Noofolger Tom Buhrow. Ihri letscht Sändig het si am 24. Juni 2007 moderiert. Si isch derno vu dr Caren Miosga abglest wore.

Wu dr Günther Jauch di aabote Position abglähnt het, hän d Intendante vu dr ARD d Will zur Noofolgeri vu dr Sabine Christiansen fir ihri bolitisch Talkshow gwehlt,[3] wu unter em Name Anne Will am 16. Septämber 2007 zum erschte Mol uusgstrahlt woren isch. Si wird produziert vu dr Will Media GmbH, wu d Anne Will Gschäftsfierewri dervu isch. Am 10. Juli 2011 het si ihri letscht Sändig uf däm Sändeblatz moderiert, voreb ab em 11. Septämber 2011 doch dr Günther Jauch dää yygnuu het. Ihri Sändig isch derno als am Mittwuche am 22.45 Uhr im Erschte glofe. Syt em Ruggzug vum Jauch Ändi 2015 wird Anne Will wider am Sunntigoobe gsändet.[4]

Im Septämber 2013 het si zäme mit dr Maybrit Illner, em Peter Kloeppel un em Stefan Raab s Chanzlerkandidate-Duell zwische dr Angela Merkel un em Peer Steinbrück moderiert.[5]

Privatlääbe[ändere | Quälltäxt bearbeite]

D Will läbt z Berlin. Ihri Lääbespartneri isch d Kommunikationswisseschaftleri Miriam Meckel, Schefredakteuri vu dr Wirtschaftswoche un Professori an dr Universitet St. Galle. D Beziehig, wu scho lang bstande het, het d Will anne 2007 effetli gmacht.[6][7] Am 19. Augschte 2016 hän di boode z Düsseldorf ghyrote.[8]

Weblink[ändere | Quälltäxt bearbeite]

 Commons: Anne Will – Sammlig vo Multimediadateie

Fueßnote[ändere | Quälltäxt bearbeite]

  1. Jahresbericht der Friedrich-Ebert-Stiftung 2005 (Memento vom 4. März 2016 im Internet Archive) S. 73 (PDF-Datei; 4,9 MB)
  2. Anne Will – Persönlich. NDR. Stand: 17. April 2013
  3. Porträt: Anne Will, sportliche und humorvolle Christiansen-Nachfolgerin in Süddeutsche Zeitung vom 5. Februar 2007
  4. Markus Brauck, Isabell Hülsen: ARD-Polittalk: Anne Will übernimmt Sendeplatz von Günther Jauch. uf: Spiegel Online, 9. Juni 2015.
  5. Meinung: Anne Will moderiert TV-Duell. „Quote nur um der Quote willen? Nicht mit mir“ in Tagesspiegel vum 6. Merz 2013
  6. Anne liebt Miriam in Die Tageszeitung vom 19. November 2007
  7. Anne Wills Lebensgefährtin: Miriam Meckel und das Lesbenklischee in Der Spiegel vom 7. März 2010
  8. Anne Will feiert Hochzeit in FAZ.net vom 22. Augschte 2016.
Information icon.svg Dä Artikel basiert uff ere fräie Übersetzig vu dere Version vum Artikel „Anne_Will“ vu de dütsche Wikipedia.

E Liste vu de Autore un Versione isch do z finde.