Angkor Wat

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Angkor Wat (2005)
Angkor Wat (2001)

Angkor Wat (Khmer: Ângkôr Vôtt អង្គរវត្ត; ângkôr bedütet „Stadt“, vôtt „Tämpelaalaag“) isch die grössti und bekanntisti Tämpelaalaag in dr Region Angkor in Kambodscha. Dr Tämpel befindet sich öbbe 240 km nordwestlig vo dr Hauptstadt Phnom Penh in dr Nööchi vo Siem Reap, öbbe 20 km nördlig vom See Tonle Sap.

Gschicht[ändere | Quälltäxt bearbeite]

Im 10. Joorhundert het dr Köönig vom Khmer-Riich Yasovarman I., wo vo 889–910 regiert het, Bewässerigsaalaage und Stausee lo baue und vo denn aa het mä mee as äinisch im Joor chönne Riis aapflanze. S Land isch vo däm seer riich worde und het sich zun ere regionale Grossmacht ufgschwunge. Groossi Stedt und gwaltigi Tämpelaalaage si baut worde. Dr Köönig Suryavarman II., wo vo 1113 bis öbbe 1150 regiert het, het die alte Tämpelaalaage z Angkor lo restaurieren und nöiji lo baue, drunder Angkor Wat, wo woorschinlig dr Wischnu vereert worde isch. Wil dr Tämpel in ere westlige Richdig, dr Himmelsrichdig vom Doodesgott Yama lit, dänkt mä, ass es dr Dootetämpel vom Suryavarman II. gsi isch.[1]

Im spoote 13. Joorhundert het sich im Land dr Buddhismus afo duuresetze, und sich Angkor Wat isch von ere hinduistische Kultstett zum e Tämpel vom Theravada-Buddhismus worde.[2] Us dere Zit stammt au dr Naame Angkor Wat.

Vom 16. Joorhundert aa si Tämpel vo Angkor no di no vom Urwald verschluckt worde, Angkor Wat e chli weniger dank em Wassergraabe zringsume, won en vor em Wald gschützt het.[3] Die buddhistische Mönch häi dr Tämpel nie ganz ufgee, aber si nöiji Bedütig isch vo de Öiropäer cho, wo sich für e Tämpel häi afo begäistere.

Angkor Wat isch e kambodischs Nazionalsümbol worde und wird sit 1863 uf dr nazionale Faane vo Kambodscha abbildet.

Litratuur[ändere | Quälltäxt bearbeite]

Weblinks[ändere | Quälltäxt bearbeite]

 Commons: Angkor Wat – Sammlig vo Multimediadateie

Fuessnoote[ändere | Quälltäxt bearbeite]

  1.  Maurice Glaize: Les Monuments du groupe d'Angkor. 4. Uflaag. Adrien-Maisonneuve, Paris 1993, ISBN 2-7200-1091-X, S. 57 vo dr änglische Übersetzig (PDF, 8 MB) vom Nils Tremmel bi Angkor guide, abgrüeft am 11. August 2011 (Erstauflage: Portail, Saigon 1944).
  2.  Marilia Albanese: Angkor. National Geographic Art Guide. S. 148.
  3.  Maurice Glaize: Les Monuments du groupe d'Angkor. S. 59 vo dr änglische Übersetzig (PDF, 8 MB) vom Nils Tremmel bi Angkor guide.
Information icon.svg Dä Artikel basiert uff ere fräie Übersetzig vum Artikel „Angkor_Wat“ vu de dütsche Wikipedia.

E Liste vu de Autore un Versione isch do z finde.

13.41246103.86677Koordinaten: 13° 24′ 45″ N, 103° 52′ 0″ O