Andrea Lindlohr

Dialäkt: Undermarkgreflerisch

d Andrea Lindlohr (2013)

D Andrea Lindlohr (* 19. Februar 1975 z Königswinter) isch e dytschi Bolitikeri (Bindnis 90/Di Griene). Syter anne 2011 isch si Abgordneti im Landdag vu Bade-Wirttebärg un syter 2021 Staatssekretri im bade-wirttebärgische Minischterium fir Landesentwicklig un Wohne.

Uusbildig un Beruef

D Andrea Lindlohr isch z Erpel am Mittelrhy ufgwachse un het anne 1994 z Linz am Rhein s Abitur gmacht. Derno het si z Dibenga un z Leicester Bolitikwisseschaft un Soziology studiert. Vu 2002 bis 2011 het si fir di Grien Landdagsfraktion vu dr bade-wirttebärgische Grienen as Barlemäntarischi Beroteri fir Wirtschaft un Arbet, syt 2006 au für Energy, gschafft.

Bolitischi Laufbahn

Syt anne 1998 isch d Lindlohr Mitglid vu dr Griene. Vu 1998 bis 2002 isch si Mitglid vum griene Kraisvorstand im Landkrais Dingenga gsii un vu 2005 bis 2008 em Vorstand vum Kraisverband Stuegert. Syter anne 2003 isch si Mirglid vum Landesvorstand vu dr bade-wirttebärgische Griene. Bi dr Landdagswahl 2006 het si as landeswyt jingschti Kandidati im Wahlkrais Stuegert III kandidiert. Bi dr Bundesdagswahl 2009 het si im Bundesdagswahlkrais Esslenga kandidiert.

Bi dr Landdagswahl z Bade-Wirttebärg 2011 isch si iber e Zwaitmandat im Landdagswahlkrais Esslenga in dr Landdag vu Bade-Wirttebärg gwehlt wore. Dert isch si stellverdrättendi Vorsitzeri vu dr Landdagsfraktion un wirtschaftsbolitischi Sprächeri un Sprächeri fir Böue un Wohne vu ihre Barteo.

Wu d Mitglider vum Kabinett Kretschmann I benännt wore sin, hän dr Alexander Bonde un dr Winfried Hermann ihri Bundesdagsmandat mieße nidelege, d Lindlohr isch uf dr Lischt vu dr Noorucker gstande, het aber abglähnt, wel si lieber Landdagsabgordneti het welle blybe. Im Landtag isch si vu 2011 bis 2016 Mitglid im Bresidium, im Finanz- und Wirtschaftsuusschuss, im Ständigen Uusschuss un im Untersuechigsuusschuss EnBW-Deal gsii.

Bi dr Landdagswahl 2016 het si s Erschtmandat im Wahlkrais Esslenga gwunne. In dr 16. Wahlperiod vu 2016 bis 2021 isch si Mitglid Bresidium, im Uusschuss fir Wirtschaft, Arbet un Wohnigsböu, im Uusschuss fir Finanze un im Uusschuss no Artikel 62 vu dr Verfassig (Notbarlemänt) gsii.

Bi dr Landdagswahl 2021 het si mit 35,7 Brozänt vu dr Stimme wider s Erschtmandat im Wahlkrais Esselenga gwunne. Syt Mai 2021 isch si im Kabinett Kretschmann III Staatssekretri im Minischterium fir Landesentwicklig un Wohne.

Sunschtigs Engaschmänt

• Mitglid im Ufsichtsrot vu dr Landesmesse Stuttgart GmbH
• Mitglid im Unternehmerbeirat der Baden-Württemberg International GmbH
• Mitglid im Kuratorium vu dr Landesakademie des Handwerks
• Stellvrsdrättend Mitglid vum Verwaltigsrot vu dr Landeskreditbank Baden-Württemberg – Förderbank
• Mitglid in dr Heinrich-Böll-Stiftung Baden-Württemberg (1999-2003 Vorstand)
• Vorsitzeri vum Fördervereins der Volkshochschule Esslingen e. V.
• Mitglid in dr Vereinigung der Freunde der Universität Tübingen e. V.
• Mitglid im Verkehrsclubs Deutschland
• Mitglid bi Amnesty International

Persenligs

D Andrea Lindlohr isch remisch-katholisch, isch ghyrote un het e Chind. Si wohnt mit ihrem Mann z Esslenga. Si sait vu sich sälber, si diei mittlerwyli ganz passabel Schwäbisch schwätze.

Literatur

• Ina Hochreuther: Frauen im Parlament. Südwestdeutsche Parlamentarierinnen von 1919 bis heute. Landtag von Baden-Württemberg, Stuttgart 2012, ISBN 978-3-923476-16-9, S. 201–202.

Weblink

 Commons: Andrea Lindlohr – Sammlig vo Multimediadateie

• Websyte vu dr Andrea Lindlohr
• Abgordneteprofil bim Landdag Bade-Wirttebärg in dr 16. Wahlperiod
• Andrea Lindlohr uf abgeordnetenwatch.de