André Masson

Dr André Masson (* 4. Januar 1896 z Balagny-sur-Thérain, Departemänt Oise; † 28. Oktober 1987 z Baris) isch e französische Mooler, Grafiker und Bildhauer gsi.

Läbe und Wärk

Masson isch erst vierzähni gsi, won er an dr Kunstakademi z Brüssel gstudiert het. denn het er z Baris an dr École Nationale Supérieure des Beaux-Arts bim Paul Baudoin gstudiert. Wo dr Erst Wältchrieg usbrochen isch, het er sich als Freiwillige gmäldet. 1917 isch er schwer verletzt worde.

Zerst isch dr Masson vom Kubismus beiiflusst worde. Er het am Aafang vo dr 1920er Johre in dr rue Blomet z Baris en Atelier gha; si Nochber, won er mit em e Fründschaft gschlosse het, isch dr Joan Miró gsi. 1924 het er sich für e Zitli de Surrealiste um e André Breton aagschlosse. Im Johr 1928 het er under anderem mit 150 Radierige en erotische Roman Le Con d'Irène (dütsch: Irènes Möse) vom Louis Aragon under em Pseudonym Albert de Routisie illustriert.

Dr Masson isch au en änge Fründ vom Georges Bataille gai, wo am Aafang vo de drissiger Johr die „dissidänte“ Surrealiste um sich gsammlet het. Er het grosse Iifluss gha uf d Zitschrift Acéphale, wo dr Bataille gründet het und e Nietzsche-Lektüre propagiert het, wo d Felschige vo dr Elisabeth Förster-Nietzsche us em Wärk uusegnoh het; er isch au am Collège de Sociologie drbii gsi. 1938 het er zsämme mit in- und usländische Künstlerkollege in dr Exposition Internationale du Surréalisme, Galerie Beaux-Arts, z Baris Wärk usgstellt.

Femme tourmentée (1942) vom André Masson

Am Aafang vom zweite Wältchrieg het dr Masson z Spanie gläbt, wo die Dütsche immer meh vo Europa eroberet hai, isch er 1942 in d USA emigriert und het au e zitlang uf Martinique gläbt. 1945 isch er uf Frankriich zrugg.

Dr André Masson het deilgnoh an dr documenta 1 (1955), dr documenta II (1959), und au an dr documenta III im Johr 1964 z Kassel.

Im Masson siine Wärk findet mä än existenzielli Unrueh, wo die beide Wältchrieg und d Krise zu siiner Zit widerspieglet. Si Wärk, wo sich stilistisch die ganz Zit veränderet het, strahlt Erfindigsrichdum und groossi Gstaltigschraft us. Er het mit de Surrealiste im Baris vo de 1920er und 1930er Johr e lyrisch-spontani, abstrakti Moolwiis (psychische Automatismus / écriture automatique) entwigglet. Er isch also eine vo de erste Mooler, won e bewusste Zuegang zum Irrationale, Unbewusste gsuechz hai. Eins vo dene Wärke si die Vingt-deux dessins sur le thème du désir (Zweiundzwanzig Zeichnige zum Thema vo dr Begierde), wo in sehr churzer Zit eins noch em andere entstande si.

Näbe zahlriiche Gmälde (under anderem au mit Materialie wie Lehm und Sand) het er au Skulpture, Bühnebilder und Buechillustratione gmacht. Im Théatre Odéon z Baris het dr Masson e Bild uf dr Decki gmacht.

Dr Dirigänt Diego Masson isch si Sohn. Dr André Masson isch e Stiefbrueder vom iiflussriiche Psychoanalytiker Jacques Lacan.

Wärk (Uswahl)

• Gradiva, (1939),Öl uf Liinwand, Musée National d'Art Moderne, Centre Pompidou, Paris
• La Pythie (Pythia), (1943; 130,5x106,5cm; Musée National d'Art Moderne, Centre Pompidou, Paris)
• Barbara Sietz (Hrsg.): André Masson. Gesammelte Schriften Band II (Batterien Band 70). Berlin, Verlag Matthes & Seitz (Sammlung Klewan) 2005. 280 S. ISBN 3-88221-297-7 (ersti gsammleti Vorlag vo de Hauptschrifte vom Masson).

Litratur

• Kai Buchholz, Klaus Wolbert (Hg.): André Masson. Bilder aus dem Labyrinth der Seele. Frankfurt a. M. 2003.
• Martin Ries: André Masson: Surrealism and His Discontents, Art Journal, N.Y., vol. 61, no.4, winter 2002

Weblingg

• Masson at the Tate Gallery (änglisch)
• Kurzbiografie (änglisch)
• Arbet mit Gedicht (änglisch)
• Materialien von und über André Masson im documenta-Archiv