Alois Reding

Dr Alois Josef Fridolin Reding vo Biberegg, Alois vo Reding oder nume Alois Reding (* 6. Merz 1765 z Schwyz; † 5. Februar 1818 z Schwyz) isch e Schwiizer Politiker und Milidär gsi.

Läbenslauf

Dr Alois Reding isch as Sohn vom Schwyzer Aristokrat Josef Rudolf Reding vo Biberegg (1726–1799) z Schwyz uf d Wält cho. Si Brueder isch dr General Theodor vo Reding gsi. Er het e milidärischi Karriere iigschlage und bis 1788 in de Schwyzer Regimänt Spanie dient, zletzt as Oberstlütnant. Nochdäm er zruggcho isch, isch er Landeshauptma vom Kanton Schwyz worde. Wo die französische Druppe noch dr Konstituierig vo dr Helvetische Republik am 12. April 1798 z Aarau gege die widerspänstigi Innerschwiiz aagruckt si, het me dr Alois Reding zum Befählshaber vo dr Armee vo de Kantön Uri, Schwyz und Unterwalde ernennt.

D Gfächt bi Schindellegi, Rothedurm und Morgarte het dr Reding am 2./3. Mai 1798 zwar gwunne, het aber wäge siine hoche Verlust en ehrevolli Kapitulation müesse akzeptiere. Wäge sine Siig isch dr Reding in de konservative und föderalistische Kreis in dr Schwiiz bekannt worde, und dorum het men en im Oktober 1801 noch em Staatsstreich vo de Föderaliste zum erste Landamma vo dr Helvetische Republik usgrüeft. No im April 1802 isch er wider vo de Unitarier, de Ahänger von ere zentralistische Eiheitsverfassig, gstürzt worde, und druf het er dr Stäcklichrieg gege d Republik eröffnet.

Nochdäm Frankriich dr Ufstand niidergschlage het, isch dr Reding für e baar Möned in dr Festig Aarburg inhaftiert worde. D Mediationsverfassig isch agnoh worde und dr Reding isch noch siiner Freilassig 1803 und 1809 wider zum Landamma vo Schwyz gwehlt worde.

Literatur

Edwin Züger: Alois Reding und das Ende der Helvetik. Zürich 1977.
Aymon de Mestral: Aloys von Reding, ein Held des nationalen Widerstandes. Zürich 1945.
Hans A. Wyss: Alois Reding: Landeshauptmann von Schwyz und erster Landammann der Helvetik. Stans 1936.
Georg von Wyß: Reding von Biberegg, Alois Graf. In: Allgemeine Deutsche Biographie (ADB). Band 27, Duncker & Humblot, Leipzig 1888, S. 523–529.

Weblingg

Dr Ardikel "Reding von Biberegg, Alois Graf" in dr Allgemeine Deutsche Biographie
Artikel im Brockhaus (1837)
Josef Wiget: Reding, Alois. In: Historisches Lexikon vo dr Schwiiz.

Dä Artikel basiert uff ere fräie Übersetzig vu dere Version vum Artikel „Alois_von_Reding“ vu de dütsche Wikipedia. E Liste vu de Autore un Versione isch do z finde.