Alfons Oswald

Dr Alfons Oswald (* 8. Februar 1903 z Norschige; † 25. Mai 1969 z Fryburg) isch e dytsche Landroot im Nazionaalsozialismus im bsetzte Poole gsii. Im Dischtrikt Krakau het er as Kraishauptmann un im Dischtrikt Radom as laitende Mitarbaiter vu dr Dischtriktverwaltig an der Organisazioon vum Holocaust mitgmacht. In dr Bundesrepublik Dytschland isch er langjeerige Landroot in dr Krais Säckinge, Ämmedinge un Fryburg woore.

Lääbe

Dr Alfons Oswald het vu 1921 bis 1924 z Dibenga, z Hamburg un z Fryburg Nazionaalekonomy un Räächtswisseschafte studiert. Anne 1924 isch er Mitgliid vu dr kadoolische Studänteverbindig K.D.St.V. Wildenstein Fryburg im Brysgau woore. S Stuudium het er us wiirtschaftlige Grind mieße unterbräche un het s eerscht ab 1925 chenne wytermache un 1928 di eerscht juristisch Staatsbriefig ableege, 1931 di zwoot. Zum 1. April 1934 isch er Regierigsroot z Neistadt woore, 1936 isch er uf Eschinge versetzt woore. In d NSDAP isch er noo dr Luckerig vu dr Mitgliider-Ufnaamspeeri anne 1937 yydrätte, 1939 isch s zue me Barteigriichtsverfaare chuu, wu am 17. Februar 1943 yygstellt wooren isch.

Mit Yyriichtig vum Generaalguwernemänt z Poole isch er ab Septämber 1939 zeerscht Landkommissaar im Krais Dębica im Dischtrikt Krakau gsii un deert vum 15. Dezämber 1939 bis zum 22. Juuni 1941 Kraishauptmann. Sy Dischtriktguwerneer isch dr Otto Wächter gsii. Druf isch er bis Dezämber 1943 in dr innere Verwaltig im Dischtrikt Radom unter em Dischtriktguwerneer Ernst Kundt. Nocherdani isch er in d Weermacht yyzooge woore. Anne 1945 isch er in Chriegsgfangeschaft gsiii.

Dr Oswald het si an sym Woonoort Radom am 7. Augschte 1942 derfiir yygsetzt, ass e jiidischi Handwäärcherfamilie in dr Stadt het chenne blyybe, wel er mit iire Aarbet seli zfriide gsii isch. Glyychzytig het er zuegluegt, wie s chlai un am 16. Augschte 1942 s grooß Ghetto z Radom gruumt wooren isch un 20.000 Juude in s Verniichtigslaager Treblinka deportiert woore sin. Zwee Moonet vorhäär het si dr Oswald as stellverdrättende Dischtriktguwerneer bschwäärt, ass d Akzioon Reinhardt im Dischtrikt Radom „eerscht“ im Augschte 1942 aafange diei un sy Dischtrikt bi dr Deportazioon vu dr Juude in Dischtrikt Lublin ins Hinterdräffe groote seit, deert isch s Verniichtigslaager Belzec glääge.

Iber d Entnazifizierig vum Oswald waißt mer nyt. Ass es zue däm aktekundige Stryt mit dr NSDAP chuu isch, het em uf alli Fäll ghulfe, ass er waidli wider in dr Verwaltig het chenne schaffe. Ab em 1. Jänner 1946 isch er Landroot im Landkrais Säckinge gsii, ab em 7. Jänner 1949 Landroot im Landkrais Ämmedinge un vum 1. Juuni 1953 bis 1968 Landroot im Landkrais Fryburg. Syt Novämber 1953 isch dr Oswald Mitgliid vu dr CDU gsii.

E Verfaare wäge unaidliger Falschuussaag im Zämehang mit dr Ermittligsverfaare, wu no 1959 yyglaitet wooren isch, wel d Kraishauptlyt bi dr NS-Verbrächen im bsetzte Poole mitgmacht het, sich anne 1965 bi dr Staatsaawaltschaft Fryburg wäg Verjeerig yygstellt woore.

Wun er 1968 pänsioniert wooren isch, het er s Grooß Bundesverdienschtchryz iiberchuu. Z Eerechilche-Norschige isch e Strooß noch em gnännt.

Literatur

• Markus Roth: Herrenmenschen. Die deutschen Kreishauptleute im besetzten Polen – Karrierewege, Herrschaftspraxis und Nachgeschichte. Wallstein Verlag : Göttingen 2009. ISBN 9783835304772.
• Bogdan Musial: Deutsche Zivilverwaltung und Judenverfolgung im Generalgouvernement. Harrassowitz, Wiesbaden 1999, ISBN 3-447-04208-7.
• Wolfram Angerbauer (Red.): Die Amtsvorsteher der Oberämter, Bezirksämter und Landratsämter in Baden-Württemberg 1810 bis 1972. Herausgegeben von der Arbeitsgemeinschaft der Kreisarchive beim Landkreistag Baden-Württemberg. Theiss, Stuttgart, ISBN 3-8062-1213-9, S. 434. 

Fueßnote

Dä Artikel basiert uff ere fräie Übersetzig vu dere Version vum Artikel „Alfons_Oswald“ vu de dütsche Wikipedia. E Liste vu de Autore un Versione isch do z finde.