Elsgau

S Elsgau isch e Region im Nordweschte vom Schwiizer Kanton Jura. Dört redt ma französisch u wäge dem sait me zu de Region Ajoie oder au Pays de Porrentruy.

Geografy

De Hauptort vom Elsgau isch Pruntrut. D Region het e Flächi vo öpper 300 Kwadratkilometer un ligt zwüsche 400 u 600 Meter Höchi. Si ghört zum Tafeljura u isch es wyts und zimli flachs Tal, wo drususe d Allaine zum Doubs abe flüsst. Di chalkhaltige Böde sin gäbig für de Obschtbau, u au Wiibau wird im Elsgau betribe. Interessant für Tourischte sin d Höhlene, aber au d Planwage-Route u dr prähistorisch Park z Réclère.

Politisch isch s Elsgau fascht deckigsgliich mim Bezirk Pruntrut. Numme de Clos du Doubs ghört landschaftlich nöd zum Elsgau.

Gschicht

De Elsgau wird in ere Urkund us em Johr 732 s erscht mol gnennt, wo de Herzog vom Elsass Ländereie in pago Alsegaugensi em Chloschter Murbach übertrait. D Herrschaft übers Elsgau het öfter emol gwächslet u isch im Johr 999 unter di wältlich Macht vom Fürstbischof vo Basel gfalle. D kirchlich Macht hets Bistum Basel bis zum Johr 1779 numme z La Baroche gha, de Rescht vom Elsgau het zu de Diözese Besançon ghört.

Wo d Fürschtbischöf im 14. Johrhundert finanzielli Probläm hei übercho, hei si fascht s ganze Elsgau de Grafe vo Mömpelgard verkauft. De Fürschtbischof Johann vo Vennige het im 1461 s Elsgau aber wider chönne zruckkaufe. Spöter sin witeri Herrschafte u Dörfer ans Fürschtbistum cho, nämlich Roche-d’Or im Johre 1474, Rocourt im 1573, Miécourt u Beurnevésin ane 1625. Ab do isch d Gschicht vom Elsgau di gliich wi di vom Fürschtbistum Basel.