Agostino Steffani

Us der alemannische Wikipedia, der freie Dialäkt-Enzyklopedy
Dr Agostino Steffani

Dr Agostino Steffani (* 25. Juli 1654 z Castelfranco Veneto, Venezie; † 12. Februar 1728 z Frankfurt am Main) isch en italiänische Komponist, Diplomat und katholische Ditularbischof gsi.

Lääbe[ändere | Quälltäxt bearbeite]

Dr Steffani isch bi Verwandte z Padua ufgwaggse und uf s Gymnasium gange. 1667 isch er mit em bayrische Kurfürst Ferdinand Maria uf Münche, won er Orgleunderricht bim Johann Caspar von Kerll gnoo het.

1672 het er zwäi Joor lang z Rom bim Ercole Bernabei gleert und au katholischi Theologii afo studiere. 1674 het er aagfange Vokalwärk z veröffentlige. 1680 isch er zum Briester gweiht worde.

Autograaf vom ene Kammerduett

1681 isch er z Münche zum Kammermuusigdiräkter ernennt worde und het Opere, Ballett, Karnevalscherz und Durnier komponiert. Er het au as Diplomat für e Kurfürst gschafft. 1686 isch er zum Münchner Hoofkapällmäister ernennt worde. Denn isch er für e Zitli uf Italie und denn uf Hanniver won er bis 1696 fast jedes Joor nöiji Opere uusegee het. 1696 isch dr Steffani uf Brüssel züüglet. Er isch gäistlige Rootbresidänt vom Kurfürst Johann Wilhelm z Düsseldorf worde, denn ghäime Root und Regierigsbresidänt vo Kurpfalz. 1703 und 1704 isch er Räkter und Kurator an der Universidäät Häidelbärg gsi.[1] Im Septämber 1706 isch er zum Ditularbischof vo Pegae/Spiga in partibus infidelium ernennt worde.

Epitaph im Frankfurter Dom

1708 isch er as Vermiddler zwüschen em Kaiser und em Babst uf Rom. Im Joor druf isch er dr Apostolisch Vikar vom Vikariat für Ober- und Niidersaggse worde.

Dr Agostino Steffani isch 1728 am ene Schlagaafall z Frankfurt gstorbe und im Kaiserdom St. Bartholomäus begraabe worde.

Wärk (Uswaal)[ändere | Quälltäxt bearbeite]

  • Marco Aurelio, Libretto vom Ventura Terzago, urufgfüert z Münche 1681.
  • Solone, Libretto vom Ventura Terzago, urufgfüert z Münche 1681.
  • Audacia e Rispetto, urufgfüert z Münche 1685.
  • Servio Tullio, Libretto vom Ventura Terzago, urufgfüert z Münche 1686.
  • Erote e Anterote, Libretto vom Ventura Terzago, urufgfüert z Münche 1686.
  • Ascanio, Libretto vom Ventura Terzago, urufgfüert z Münche 1686.
  • Alarico il Baltha, cioè l’Audace, Re de’ Gothi, Dramma per musica in drei Akt, Libretto vom Luigi Orlandi, urufgfüert z Münche am 18. Januar 1687.
  • Niobe, Regina di Tebe, Dramma per musica in drei Akt, Libretto vom Luigi Orlandi, urufgfüert z Münche 1688.
  • Tassilone, Tragedia per Musica, entstande 1709, uusegee vom Gerhard Croll in dr Räije Denkmäler Rheinischer Musik.
  • Enrico Leone, Dramma in drei Akt, urufgfüert am 30. Januar 1689 zur Eröffnig vom Hoftheater Hannover.
  • Stabat Mater für 6 Sänger und 7 Instrumentaliste.
  • Spezza amor, l´arco e li strali“, Kantate für Sopran, Oboe, Fagott und Basso Continuo.

Litratuur[ändere | Quälltäxt bearbeite]

  • Claudia Kaufold: Ein Musiker als Diplomat: Abbé Agostino Steffani in hannoverschen Diensten (1688-1703). Bielefeld: Verlag für Regionalgeschichte 1997 (Veröffentlichungen des Instituts für Historische Landesforschung der Universität Göttingen 36), zugl.: Göttingen, Univ., Diss., 1994
  • Colin Timms: Polymath of the Baroque: Agostino Steffani and His Music. Oxford/New York: Oxford University Press 2003 ISBN 9780195154733
  • Sabine Wehking: Steffani, Agostino. In: Biographisch-Bibliographisches Kirchenlexikon (BBKL). Band 10, Herzberg 1995, ISBN 3-88309-062-X, Sp. 1263–1265.
  • Rob. Eitner: Steffani, Agostino. In: Allgemeine Deutsche Biographie (ADB). Band 35, Duncker & Humblot, Leipzig 1893, S. 549–553.

Weblingg[ändere | Quälltäxt bearbeite]

 Commons: Agostino Steffani – Sammlig vo Multimediadateie

Fuessnoote[ändere | Quälltäxt bearbeite]

  1. Website vo dr Universidäät Häidelbärg über e Agostino Steffani, abgrüeft am 12. Oktober 2012
Dä Artikel basiert uff ere fräie Übersetzig vum Artikel „Agostino_Steffani“ vu de dütsche Wikipedia. E Liste vu de Autore un Versione isch do z finde.