Dr Affebrunne

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dr Affebrunne
Dialäkt: Baseldütsch

Dr Affebrunne isch e Baasler Stadtbrunne uf em Andreasblatz mit ere Skulptur vom ene aazognige Aff uf em Brunnestock. Dr Brunne isch dänggmolgschützt und stoot uf dr Liste vo de Baasler Kulturgüeter, wo regionali Bedütig häi.

Gschicht[ändere | Quälltäxt bearbeite]

Scho 1393 isch en Affebrunne in dr Stadt erwäänt worde. Dä isch bim alte Spiddaal am Spittelsprung, em hütige Münsterbärg, gstande. Mä nimmt aa, ass er 1585 abbroche worde isch.

Öb mä die alti Affefigur vom Brunnestock zum Aeschevorstadtbrunne versetzt het, wäiss mä nid. Uf jeede Fall isch dr Naame Affebrunne für e Brunne am Egge vo dr Aeschevorstadt und dr Elisabethestrooss us em Joor 1657 bekannt. Dä Brunne stammt us em 17. Joorhundert und d Affeskulptur isch woorschinlig gliich alt. 1838 isch er abbroche worde und e nöije Brunne ganz in dr Nööchi baut worde. Dr Brunne het en achteggige Brunnestock überchoo und dr alt Aff isch oobe drufgsetzt worde. 1860 het mä dr Brunnedroog für z grooss ghalte und e chliinere aanegstellt und dr Droog in d Petersgass versetzt. 1866 het mä dr Brunne umbaut und dr Aff isch verschwunde.

Im Joor druf isch dr Brunne uf em Andreasblatz entstande und uf e Brunnestock het mä dr alt Aff us dr Aeschevorstadt gsetzt. 1895 het er en Umfall ghaa und en Arm verloore. Er isch überhaupt schon e chli alt und am usenandergheije gsi. Dorum het mä 1916 em Jean Hym dr Ufdraag gee, e Kopii vom Aff zmache, und s Original isch in s Historische Museum choo.

Kwelle[ändere | Quälltäxt bearbeite]

  • Der Affenbrunnen auf dem Andreasplatz uf altbasel.ch, abgrüeft am 29. Mai 2014
  • Michael Gasser, Marianne Härri: Die Basler Aeschenvorstadt: Bausteine einer wachsenden Stadt, C. Merian, 2001, S. 102f.
  • André Salvisberg: Die Basler Strassennamen, Christoph Merian Verlag, 1999, S. 81
  • Paul Meintel: Schweizer Brunnen, Huber, 1931 , S. 112
  • Annie Kaufmann-Hagenbach: Die Basler Plastik des fünfzehnten und frühen sechzehnten Jahrhunderts, Birkhäuser, 1952, S. 64

47.5582097.586286Koordinaten: 47° 33′ 30″ N, 7° 35′ 11″ O; CH1903: 611114 / 267510