Renfe

E aglüegti Version vo derre Site, wo am 23. Jänner 2020 freige worre isch, basiert uff derre Version.

D Red Nacional de los Ferrocarriles Españoles (RENFE), syt 2005 Renfe (Renfe Operadora) isch di schpanisch Schtaatsysebahngsellschaft. Uusgschribe heisst das „Red Nacional de los Ferrocarriles Españoles“. Si isch zueschtändig für äs Bräitschpurnetz vu-n-erä Schpuurwiiti vu 1668 Millimeeter. Diä Gsellschaft isch am 24. Januar 1941 uf ghäiss vu d'r Regiärig under em General Franco entschtande. Alli Ysebahnliniä hend duez'mal a private Gsellschafte gchört, und diä hend alli Exischtänzschwirigkäite gchaa. D' RENFE hät d' Schmalspurbahn zwüsche Cercedilla und Cotos übernuu. Wäg em zuenehmende Schtrassevercheer sind vill Schmalspurbahne schtillgläit wordä, und diä wu noch übrigblibä sind, sind i privatem Bsitz blibä. D' RENFE hät au äinigi Nüübuuvorhabe chänne realisiere. Si isch i dä Füfzgerjahr d'r Trans-Europ-Express-Kommissiuu biiträte. Si schtellt mit de Talgozüüg ä Zugskategorie wu mer a d'r Gränze zu Franggriich cha uf di mitteleuropäisch Normalschpuur umschtellä. Hüt isch si au am Hoochgschwindigkäitsnetz betäiligt.

Schnällfahrstrecke

Charte vom spanische Hochgschwindigkeitsnetz:

0 in Bedriib

0 im Bau

0 plant

0 Studie

1992 isch die erst Hochgschwindigkeitsstrecki für e Hochgschwindigkeitszug AVE (Alta Velocidad Española) zwüsche Madrid und Sevilla in dr europäische Normalspur baut worde.

Im Johr 2008 het s z Spanie fümf Schnällfahrstreckene ge:

Madrid–Sevilla
Córdoba–Málaga
Madrid–Barcelona–Französischi Gränze (in Bedriib bis Barcelona)
Saragossa–Huesca
Madrid–Valladolid

Au vorhandeni Breitspurstrecke si usgebaut worde, wie z. B. d Verbindg Barcelona–Valencia–Alicante (Corredor Mediterráneo gnennt), wo der Hochgschwindigkeitszug Euromed druf iigsetzt wird.