Antikörper

Ufbau vom ene tüpische IgG-Antikörper
1. Fab-Abschnitt
2. Fc-Abschnitt
3. schweeri Chettene
4. liichti Chettene
5. Antigeenbindigsstell (Paratop)
6. hinge-Regioon (dt. ‚Scharnier‘)
(*) -S-S-Disulfidbrugg

E Antikörper wo mit Papain verdaut worde isch (zwäi 50-kDa-Fab-Fragmänt und äi 50-kDa-Fc-Fragmänt)

Antikörper (Immunglobuliin, Immunoglobulin, veraltet Gammaglobulin) si Proteiin (Eiwiss) us dr Klass vo de Globuliin, wo in Wirbeldier as Reakzionsbrodukt vo bsundere Körperzälle (Plasmazälle) uf bestimmte Stoff (Substanze, wo as Antigeen bezäichnet wärde) bildet (synthetisiert) wärde. Antikörper si Däil vom Immuunsüsteem. Antikörper wärde von er Klass vo wisse Bluetzälle, de Plasmazälle,broduziert uf e Reakzioon vo de B-Lymphozyt aane. Si si e zentraale Bestanddäil vom Immuunsysteem vo hööchere Wirbeldier.

As Antigeen wirke fast usschliesslig Makromoleküül oder Moleküül, wo an Partikel bunde si, zum Bispil Lipopolysacchariid an dr Ooberflechi vo Bakterie. E bestimmts Antigeen induziert mäistens d Bildig vo nume e baar, ganz bestimmte, Antikörper, wo drzue basse und über e speziifischi, nit-kowalänti Bindig mäistens nume dä Fremdstoff erkenne (dass au verwandti Ziil chönne erliggt wärde, het mä z. B. bi dr Pockeschutzimpfig usgnützt: D Antikörper, wo vom Körper gege die harmloose Chuepocke bildet wärde, erkenne au d Pockewiire, wo für Mensche pathogeen si). Die speziifischi Bindig vo Antikörper an d Antigeen isch e wääsentlige Däil vo dr Abweer gege Fremdstoff, wo in dr Körper iidringe. Wenn d Fremdstoff Chrankhäitserreeger (Pathogeen) si, cha d Bildig und Bindig vo Antikörper zur Immunidäät füere.

Antikörper wärde, wie s die schweedischi Immunoloogin Astrid Fagraeus 1948 zum erste Mol beschriibe het, von ere Klass vo wisse Bluetzälle (Löikozüte) as Sekrezioon abgsunderet. Die Zälle wärde as Effektorzälle beziejigswiis as Plasmazälle bezäichnet und si differenzierti B-Lümfozüte. Si chömme im Bluet und in dr extrazellulääre Flüssigkäit vo de Gwääb vor und „erkenne“ mäistens nit die ganzi Strukduur vom Antigeen, sondern nume e Däil drvoo, die sognennte antigeene Determinante (s Epitop). Die speziifische Antigeenbindigsstelle vom Antikörper bezäichnet mä as Paratop. Wenn d Antikörper mit em Antigeen in Kontakt chömme, chunt s zur sognennte humoraale Immuunantwort (humoraale Abweer).

Liddratuur

• Stefan Dübel, Frank Breitling, André Frenzel, Thomas Rostock, Andrea L.J.Marschall, Thomas Schirrmann, Michael Hust: Rekombinante Antikörper. Lehrbuch und Kompendium für Studium und Praxis. 2. Auflage. Springer Spektrum, Berlin 2019, ISBN 978-3-662-50275-4, doi:10.1007/978-3-662-50276-1. 
• Stefan Dübel, Janice M. Reichert (Hrsg.): Handbook of Therapeutic Antibodies. 2. Auflage. Wiley-VCH Verlag GmbH & Co. KGaA, Weinheim 2014, ISBN 978-3-527-32937-3 (englisch). 
• J. Lindenmann: Origin of the terms 'antibody' and 'antigen'. In: Scandinavian journal of immunology. Band 19, Nummer 4, April 1984, S. 281–285, doi:10.1111/j.1365-3083.1984.tb00931.x, PMID 6374880.

Weblingg

 Commons: Antikörper – Sammlig vo Multimediadateie