Erwin Monterin
Dr Erwin Monterin (* 29. Merz 1913 z Greschonei-Sent-Johann; † 15. Septämber 2006) isch e italienische Gaschtwirt, Buur un Dialäktdichter vu Greschonei gsii.
Lääbe
[ändere | Quälltäxt bearbeite]No dr Schuel isch er drei Johr uf s Prieschterseminar z Aosta gange, het s Studium us gsundhaltlige Grind aber abbroche, isch retuur in sy Haimetdorf un het uf em Buurehof vu syne Eltere mitghulfe.
E baar Johr lang isch er Hittewart vu dr Capanna Regina Margherita uf dr Signalkuppe im Monte-Rosa-Massiv gsii.
Wänn Saison gsii isch, het er als in dr Chällerei vu dr Greschoneier Wyyhandelsfamilie Scaler z San Severo z Apulie gschafft.
Z Greschonei het er mit syre Frau ne Reschtaurant bedribe.
Walsertitsch
[ändere | Quälltäxt bearbeite]Dr Monterin het si aktiv engaschiert fir s Greschoneititsch, sy Muetersproch. Är het s Walser-Kulturzentrum mitgrindet un isch dert (zäme mit em Heinrich Welf) ais vu dr aktivschte Mitglider gsii.
Är het mitgmacht mit Zämmedrage vum Matrial fir s Greschoneititsch-Werterbuech. Vor allem topografischi Näme vu dr Gegnig sin syni Sterki gsii, wel er vu allene Waide, Hitte un Ecke no di titsche Näme gwisst het.
Derzue het au Gedicht uf Greschoneititsch gschribe, nyyn dervu sin publiziert wore vum Walser-Kulturzentrum im Band Orizzonti di poesia.
Au am Calendario Walser het er all Johr mitgschafft.
Literatur
[ändere | Quälltäxt bearbeite]- In merioriam Erwin Monterin. In: Augusta 2007
- Walser Kulturzentrum des Aostatals (Hrsg.): Orizzonti di poesia. Testi e composizioni nell’idioma di Gressoney e Issime. Tipografia Valdostana, Aosta 1995