Verein Pendelzug Mirage

De Verein Pendelzug Mirage (churz VPM) isch e Verein vo ehrenamtleche Mitarbeiter, wo sech zum Ziu gsetzt het, e Pänduzug vom Typ Mirage, oder ou bekannt unger der Typebezeichnig BDe 4/4 II bzw. neu BDe 576 vo der damalige Ämmitau-Burglef-Thun-Bahn (EBT) z erhaute. De Sitz isch offiziell z Zäu, stationiert isch der Zug im Lozärner Hingerland.

De ehrenamtlech organisierti Verein isch ou aus Fahrzüghauter im Nationale Fahrzüügregischter (NVR) iitreit und füehrt im Johr ungfähr 4 öfentlechi u zuesätzlech witeri gmieteti Fahrte ufem gsamte Schwizer Normauspur-Isebahnnetz düre. De Zug chame miete für bis zu 250 Persone, oder meh.

Churzi Gschicht

Gründet Afang 2008 het sech de Verein währed Johre vor auem em Rückbou, de Roschtsanierig u Neulackierig vom Zugfahrzüüg, em BDe 4/4 II 201 "Burgdorf", gwidmet. Das Vorhabe isch 2016 fertig worde. Im gliche Johr, am 14. Septämber, het s Fahrzüüg sine 50-jährige Geburtstag gfiiret.

Afangs 2023 het me uf Lokalhelden.ch en Sammelaktion gstartet um de verblibend RBDe 566 I vo der CJ chäne z übernäh. D Aktion het erfolgrich geendet und me het de Zug am 27. Mai 2023 in d alti Heimat chäne überfüehre.

Fahrzüüg

De Verein het folgendi Fahrzüg im eigene Bestand:

BDe 4/4 II 201 "Burgdorf"

VPM-BDe 4/4 II 201 "Burgdorf"

Dr Triebwage mit dr Bezeichnung BDe 4/4 II u sire Nummere 201 treit sit Mai 13 s Wappe vo Burgdorf. Das Wappe isch auerdings e Nachbiudig. De Triebwage isch nämlech 1966 ad Südoschtbahn (SOB) aus BDe 4/4 82 abgliferet worde (erbout vo der Schwizerische Industrie- Gseuschaft (SIG) in Neuhuse u der Brown-Boveri Cie (BBC) ind Oerlikon) u het dört s Wappe vo Rapperswil übercho. No zur SOB-Zyt heter di nöieri Nummere 576 482 übercho u mit der Fusion zwüsche SOB und dr Bodesee-Toggeburg-Bahn (BT) di letscht Nummere 576 054.

I sire Zyt het s 82gi bzw. s 54gi binere Revision nöii Füehrerstandssitefäischter verpasst übercho u e Einholmstromabnähmer. D Trennlinie zwüsche Grüen u Créme isch tiefer gleit worde u d Übergangsbläch si ou vereifacht ussedruf (statt ungerer Abdeckig) abrocht worde. Ou ir Traktionselektrik hetme e Änderig gmacht (Überschautvorrichtig), was der Usbou vo eim Abteil inkl Fäischter im Passagierabteil het mit sich brocht. Aui die Aapassige sowie äbe der Wappetusch u e Roschtsanierig het dr VPM bis im Herbscht/Winter 15 wider zrüg bout u s Fahrzüg im Dezämber 2015 nach Bönige brocht. Dert het d BLS AG üsem Arbetstier e nöie Aastrich verpasst. Sitem März 16 isch itz o die ursprünglech Bezeichnig u Aschrifte wider dran, womit sech das Fahrzüg chum me vo sim "Vorgänger", em damalige EBT- BDe 4/4 II 201, ungerscheidet.

Im Gepäckabteil isch es Minibar- Service- Abteil mit Chüeuschränk u Früschwassertank mit Abwäschtrog ibout. Äbefaus isch hie sit Herbscht 2018 e Leistigsfähige Bordnetzumrichter ibout, wo dr ganz Zug mit der hushautsüebleche Spannig vo 230 Vout Wächsuspannig mit 50 Hertz versorgt.

A 515

VPM-A515

De A515 isch inere Serie vo EWI-Wäge vor Schwizerische Industrie-Gseuschaft SIG in Neuhuuse 1958 für d SBB bout worde u bis 2013 i Betrieb gsi, zletscht im "Papageie"-Disäin. Im Summer 2013 het dr VPM dä Wage chönne übernä. Ursprünglech hetme dr Gedanke gha, e Art Spiiwage drus z mache. Di erschte Isätz während dr Planigsphase het de aber gli zeigt, das me dä Wage besser so wiener isch cha bruche. Umfassendi Erneuerige si de im 14i gmacht worde: I Eigeregie d Roschtsanierig, d Neulackierig dür d BLS AG z Bönige u zletscht e nöie Teppich u kompletti Innereinigung wiederum in Eigeregie. D Aschrift lehntsech ad EBT-Variante u a di übrige Fahrzüg aa. Wöu aber d EBT-Gruppe nie e reine Erschtklasswage bsässe het, het sech dr Verein entschlosse, sini Initiale, VPM, azbringe.

B 218

VPM-B218

Dä Wage isch 1966 (bout vor Schwizerische Waggons- und Aufzügefabrik in Schliere, SWS) zäme mitem Trieb- u Stüürwage bir SOB i Betrieb cho u o im 2007 zum VPM cho.

Der B218 het no es Farbschema, wies damals bi der BLS agwändet worde isch: Töifi Farbtrennlinie mit Grüene Stirnfronte).

Leider het dä Wage e Drehgsteurahmeriss u isch drum vo März 2015 bis Oktober 2017 usser Betrieb gsi. Är het de z bönige bir BLS d Drehgsteu vom B458 drunger becho u so heter wider i Betrieb dörfe. Glichziitig heter d Lärmsanierig (Kunststoff-Brämssohle u entsprächends Stüürventiu sowie Gleitschutziibou) becho. Nach der Roschtsanierig u Neulackierig söu dr B218 d Initale vo de Vereinigte Huttwiler Bahne (VHB) becho.

B 227

VPM-B227

De B227 isch 1981 (bout vor Schwizerische Waggons- und Aufzügefabrik in Schliere, SWS) aus Nachbou für Pänduzüg mit de Nachbou- BDe 576 055...059 ad SOB gliferet worde u zäme mitem übrige Pändu Ändi 2007 zum VPM cho.

Sobaud der B218 wider fit isch söu dä Wage aus letschte vo üs o e Roschtsanierig u Nöilackierig übercho. Dä Wage chunt aus letschte dra, wöuer usser de Umriss vor aute SOB-Schrift und der chli blasse Farb am eheschte der EBT-Farbgäbig entspricht.

B 458 (usser Betrieb)

VPM-B458

Dä Wage isch äbefaus vo der Schwizerische Waggons- und Aufzügefabrik in Schliere (SWS) bout worde, aber damals ad BLS gliferet worde woner bis im 2015 in Betrieb gsi isch. I dere Zyt heter o ussebündigi Usseschwingtüre becho. Da die Türe nid würklech is Fahrzügbiud vo damals passe isch dä Wage für üs nur e Übergangslösig gsi. Sit d Drehgsteuh mitem B218 tuuschet worde si isch dä Wage aus Ersatzteilspänder und Matriau- Lager abgsteut. Sini verschrottig isch vorgseh, aber zytlech no offe.

ABt 202

VPM-ABt202

Der ABt 202 isch 1966 vor Schwizerische Waggons- und Aufzügefabrik in Schliere (SWS) ad SOB gliferet worde. Zäme mitem BDe 4/4 82 (em hütige VPM- BDe 4/4 II 201) heter nöii Füehrerstandssitefäischter u gändereti Übergangsbläch bechoo.

Ou der ABt 202 isch im Dezämber 2007 zum VPM cho u het im 2010 aus erschts Fahrzüg ungerem VPM i kopletter Eigeregie d Roschtsanierig u Neulackierig z Huttu bechoo. Die ganzi Büez isch für di Freiwillige e Lehrblätz i verschidenschter Hisicht gsi. So het dr VPM churz drüber beschlosse, künftig nur no d Roschtsanierig säuber z mache u d Nöilackierig extern z vergäh. Sithär übernimmt d BLS AG z Bönige d Lackierig. Witer het dr VPM beschlosse, nid d Neulackierig a bestehendi Fahrzüg azpasse (Goudigi Türe, SOB-Lackschema mit Versuechsgrüen), sondern a di damalige EBT-Farbe. Spöteschtens we aui VPM-Fahrzüg nöie Lack hei söll ou de ABt no apasst wärde.

Im 2018 heter uf dr Stirnsiite vom Zwöitklassabteil sini damaligi WC- Kabine wider becho (richtig: ursprünglech het jedi Klass sis WC gha!). Auerdings heimer hie es zuesätzlechs Minibar- Service- Abteil igrichtet damitmer besseri Möglechkeite hei, d minibars mit Nachschub z versorge.

ABt 301 (usser Betrieb)

VPM-ABt301

Der ABt 301 isch s einzige würkleche ehemalige EBT- Fahrzüg wo bis hüt überläbt het bim VPM. Momentan und bis uf Witeres wirds aus Lagerfahrzüg brucht. Nid ganz voukomme usgschlosse isch aber e möglechi Wiederinbetriebnahm, was aber sehr viu Gäud u Zyt bruchti.

X 101 (Rottewage)

Der VPM Rottewage

Der Rottewage X 101 vom VPM, wo immer z Zell staht.

Tm 24

D Tm 24 vom VPM

Für d Züg uner d Fahrleitig z verschibe, het meh im November 2022 d Tm 24 vo de OeBB chäne choufe.

RBDe I 222

VPM RBDe 566 I 222 no mit de CJ Logo vorem Depot ds Balthal

Im Jahr 2013 isch der RBDe 566 I 222 vo der BLS als Reservependel an d CJ gange. Später im Jahr 2016 isch au no der RBDe I 221 als Reservependel dezue cho, wome aber im Jahr 2022 het verschrotet.

Am 27. Mai 2023 het de der RBDe I 222 vo Alle JU uf Zell überfüehrt wärde chäne.

Im August 2023 het me bim Tribwage d vorübergehend RM-Lackierig chäne abringe.

Bt 322

De Stürwage no mit de alte CJ Logos und als ABt 922 kennzeichnet.

Zuglich zum RBDe I 222 het me ou der ABt 922 chäne überneh.

Fahrte

Der VPM füehrt jährlich ir Regu 4 öffentlichi Fahrte (je eini pro Quartal) düre. Derzue chöme möglechi öffentlichi Isätz bi Isebahn- oder süschtige Fescht. S Zügli cha ou vo Firmene u Gseuschafte bis rund 250 Persone für Fahrte ufem gsamte Normalspurnetz vor Schwiz gmietet wärde.

Weblink

 Commons: VPM – Sammlig vo Multimediadateie

• www.pendelzug-mirage.ch Website vom Verein Pendelzug Mirage (VPM)
• Flyer vom Verein