Sucellus

Us der alemannische Wikipedia, der freie Dialäkt-Enzyklopedy
d Nantosvelta und de Sucellus ofem Altoor vo Saarburg

De Sucellus isch en Gott vo de Kelte gsii, wo vor alem im östliche Gallie vereert woren isch, bsundrigs im Piet vo de Rhône und de Saône. Wel er mit eme Schlegel dargstellt werd, werd er au »Hammergott« gnennt. De Name isch Gallisch und bidütet »Guete Schläger«. Sini Partneri isch d Nantosvelta. Inere helvetische Inschrift trait er de Biiname Ipadcus[1].

Vereerig[ändere | Quälltäxt bearbeite]

Vom Sucellus sind öppe zee Inschrifte bikannt und guet zwoohundert bildlichi Darstelige, mengisch zäme mit de Nantosvelta. De bärtig Gott trait en chnüülange Chittel und het i sinere Linke e Schlegel miteme lange Stiil und i de Rechte maist e Topf, mengisch au e Füllhorn, e Sichle oder e Schwert. Beglaitet werd er hüüfig vomene Hund oder enere Chraaje. En Altoor us Saarburg mit de typische Darstelig vom Götterpaar trait d Inschrift DEO SVCELLO NANTOSVELTE[2].

Im Gegesatz zu de maiste gallische Gotthaite, isch d Interpretatio Romana vom Sucellus nöd bikannt. D Forschig vergliicht en weg sinene Attribut mitem römische Underweltgott Dis Pater oder mitem Waldgott Silvanus, wo in Gallie ebefalls miteme Schlegel dargstellt werde cha. Weniger woorschiinli isch er mitem »Donnergott« Iuppiter zämezstele.

Quelle[ändere | Quälltäxt bearbeite]

  1. CIL XIII, 5057
  2. CIL XIII, 4542

Büecher[ändere | Quälltäxt bearbeite]

  • Bernhard Maier: Lexikon der keltischen Religion und Kultur. Kröner, Stuttgart 1994, ISBN 3-520-46601-5
  • S. & P.F. Botheroyd: Lexikon der keltischen Mythologie; Diedrichs 1992. ISBN 3-424-01077-4