Silvio Berlusconi

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dr Silvio Berlusconi (2010)

Dr Silvio Berlusconi (* 29. Septämber 1936 z Mailand) isch en italiänische Politiker und Undernähmer. Zletscht isch er vom 8. Mai 2008 bis zum 12. November 2011 Ministerpresidänt vo Italie gsi.

Dr Berlusconi isch dr Ministerpresidänt in de 12., 14. und 16. Legislaturperiode sit dr Gründig vo dr Italiänische Republik noch em Zweite Wältchrieg gsi und übergangswiis Usse-, Wirtschafts- und Gsundheitsminister. Er isch dr Gründer vo dr Forza Italia Bardei. Är het au d Gründig von ere Middi-rächts-Bartei, dr Popolo della Libertàaagregt, wo denn 2009 gründet worden isch. Si eignigi Bardei isch mit dere verschmulze und dr Berlusconi isch am 29. März 2009 zum Bardeivorsitzende gwehlt worde.

Dr Berlusconi isch dr Bsitzer vom Konzärn Fininvest. Lut Forbes isch er mit eme Vermöge vo 9,4 Milliarde US-Dollar eine vo de riichste Lüt z Italie.

Läbe und Karriere[ändere | Quälltäxt bearbeite]

Dr Silvio Berlusconi isch dr eltest Sohn vom Luigi Berlusconi und dr Rosa Bossi und Brueder vo dr Maria Antonietta und vom Paolo Berlusconi. Si Vater isch Aagstellte bi dr Banca Rasini gsi, und het sich bis zum Gschäftsfüehrer ufegschafft. 1954 het dr Silvio Berlusconi d Matur am Salesianer-Gymnasium Sant’Ambrogio z Mailand gmacht. Denn het er an dr Universität Mailand e Jura-Studium agfange, won er 1961 mit ere Diplomarbet über Werbigsverdräg cum laude abgschlosse het. Für si Arbet het er vo dr Wärbigsagentur Manzoni e Briis vo über 2 Millione Lire gwunne. Näben em Studium het er as Staubsuugerverdräter und as Sänger in Nachtclub und uf Chrüzfahrtschiff gschafft. Noch em Studium hätt dr Berlusconi dr obligatorisch Militärdienst sötte mache, het aber nit dient.

1965 het er d Carla Elvira Lucia Dall’Oglio ghürotet und mit ere zwei Chinder gha: d Maria Elvira (* 1966) und dr Pier Silvio (* 1969).

Quittig für em Berlusconi si Iidritt in d Propaganda Due

Im Johr 1978 isch er in d Propaganda Due (P2) iidrätte, ursprünglig e Freimuurerloge, wo in de 1970er Johr zur Tarnig vo kriminelle politische Verschwörige missbrucht worden isch.

1985 het sich dr Berlusconi lo scheide und 1990 d Schauspiilere Veronica Lario (mit bürgerligem Name Miriam Bartolini) ghürotet. Mit ihre het er drei Chinder gha: d Barbara (* 1984), d Eleonora (* 1986) und dr Luigi (* 1988). Aafangs Mai 2009 het d Lario bekannt gee, ass si d Scheidig well iireiche.[1]

Am 13. Dezember 2009 isch dr Berlusconi z Mailand noch ere Wahlveraastaltig von eme aagriffe und im Gsicht schwer verletzt worde. Dr 42-jöhrig Däter, wo nid vorbestrooft gsi isch, dr Massimo Tartaglia, het ihm e Alabaster-Statuette vom Mailänder Dom us zwei Meter ins Gsicht gheit, und em Berlusconi si Nasebei isch verbroche und zwei vo sine Zehn si beschädigt worde.[2] Als Tatmotiv gab Tartaglia politische Gründe an.[3] Noch vier Däg het dr Berlusconi s Spiddal chönne verloo.

Skandäl[ändere | Quälltäxt bearbeite]

Dr Berlusconi het die bolitischi Debatte z Italie polarisiert und ihm si immer wider unluuteri Macheschafte vorgworfe worde. Mä het en sogar bezichdiget, mit dr Mafia Beziehige z ha. Vor Grichtsverfahre wo gegen en aagsträngt worde si, het er sich im Allgemeine chönne drucke oder er isch freigsproche worde. Langi Zit hai d Skandäl, won er din verwigglet gsi isch, die italiänischi Öffentlichkeit wenig beiiflusst. Siini Beziehige mit ere minderjöhrige Prostituierte im Johr 2010 hai aber im Johr druf zu Masseprotest gfüehrt, und am 15. Februar 2011 het e Gricht z Mailand entschiide, ass sich dr Silvio Berlusconi wäge Amtsmissbruuch und Umgang mit minderjöhrige Prostituierte vor Gricht müess verantworte. In mehrere Prozäss isch er zue Haftstrofe verurdailt worde, won er aber immer dergege in Beruefig gangen isch. Am 1. August 2013 isch er zum erschte Mol in letschter Instanz zuen ere Haftstrof vo vier Johr verurdailt worde. Noch em italienische Rächtsystem sin em dodervo drei Johr wäg siim Alter erloo worde un dr Räscht chan er im Huusarräst oder mit sozialen Ufgabe verbringe.[4] [5]

De Silvio Berlusconi muess diä Haftstraf wäg sim höchä Alter ned aträte. Sine Haftjahr werd er im Huusarrest abbüesse. De Berlusconi het am 22. Novämber 2013 bim Ministerpräsident um Gnade bitted. De Ministerpräsident Napolitano lehnt diä am 24. Novämber aber ab. Durch sini Verurteilig esch de Ex- Präsidänt au nöme im Parlament duldet, die händ am 7. November drum beschlosse, dass demit au sini politische Immunität ufghobä esch.

Fuessnote[ändere | Quälltäxt bearbeite]

  1. Spiegel online vom 4. Mai 2009
  2. „Berlusconi sieht sich als Opfer von Hasskampagne“, Welt Online, 14. Dezember 2009
  3. Bericht im Corriere della Sera, 14. Dezember 2009
  4. FAZ: Berlusconi erstmals rechtskräftig verurteilt
  5. spiegel.de: Trotz Schuldspruch: Berlusconi bleibt im Spiel