Rishikesh

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Rishikesh

Rishikesh (Hindi: ऋषिकेश, Ṛṣikeś) oder Hrishikesh (Sanskrit: Hṛṣīkeśa) isch en Pilgerort und e Stadt im indische Bundesstaat Uttarakhand mit öppe 60’000 Iiwooner.

Laag[ändere | Quälltäxt bearbeite]

Rishikesh lit am hailige Fluss Ganges am südliche Fuess vom Himalaya und isch en alte Pilgerort vom Hinduismus. De Ort isch binennt nochem Hrishikesha, emene Biname vom Vishnu. De modern Name werd aber au vom Sanskritwort ṛṣi- »Waise, Seher« abglaitet.

Di vile Tempel und Ashram vo Rishikesh liget uf baidne Flussufer und werdet dör e Fuessgängerbrugg verbunde. I de Oobedämmerig werd am Triveni Ghat jede Tag e Gangaarati (Vereerig vo de Ganga) döregfüert, hüüfig mit Prominente. Entlang vom Fluss lebet i de Wälder vill Sadhu und Sannyasin (Askete und Mönch) und z Lakshman Jhula, wo e zwaiti Fuessgängerbrugg isch, hets en Underkumpft för Wandermönch.

Bidüütig[ändere | Quälltäxt bearbeite]

d Ram Jhula Brugg

De Ort isch im Weste bikannt wore, well i de sechzger Joor d Beatles, The Beach Boys, de Donovan und anderi Musiker z Rishikesh sind goge meditiere. De John Lennon het gär e Lied mitem Titel “The Happy Hrishikesh Song” komponiert. Hüt gönd vill Mensche vo de ganze Welt uf Rishikesh zum Yoga lerne und de Ort het de Ruef d “Hoptstadt vom Yoga” z sii. Z Rishikesh het au de Swami Sivananda glebt, an vo de Pioniere vom moderne Yoga.