Rüedi-Kelch

Us der alemannische Wikipedia, der freie Dialäkt-Enzyklopedy
De Rüedi-Kelch

De Rüedi-Kelch isch en vergoldeter Abigmahlskelch us de Ziit um 1640, wo em Pfarrer Hans Heinrich Rüedi ghört het. Er isch sit em 2008 im Bsitz vo de Chilegmeind Böze im Aargau.

De Kelch[ändere | Quälltäxt bearbeite]

De Kelch isch us Silber gfertiget, vergoldet u öpper 18 ½ Zentimeter hoch u wiigt e chli me wi 200 g. Im Kelch isch en Inschrift iigraviirt: IOH: HENRICUS. RUEDI. PASTOR. ECCL: ELFING. & DENSPURANAE. Uf Alemannisch heisst des öpper: Johann Heinrich Rüedi, Pfarrer vo de Chilene z Elfige u Däischbere. Wil de Hans Heinrich Rüedi im 1636 z Elfige sis Amt aaträte het un im 1642 Däischbere abtrännt worde-n-isch, muess de Kelch im Verlauf vo dene 6 Johr in de Bsitz vom Pfarrer Rüedi cho si.
Hergschtellt worde isch er, wi e Graviirig am Fuess vom Kelch zeigt, z Zug. S isch e Marke vo Zug u s Monogramm PK igschtemplet. Wer mit PK gmeint isch, isch ned gsischeret, do git’s numme vermuetige, aber i de Chileschätz vo Staihuuse un Muätital hets Turmmonschtranze vom gliiche Künschtler, wobi di vo Muätital us em Johr 1639 isch.

De Wäg vom Kelch zruck uf Böze[ändere | Quälltäxt bearbeite]

De Hans Heinrich Rüedi isch us de Brugger Unterschicht cho u het eigentlich kei Geld gha, zum sich dermit sonen tüüre Kelch hätti chönne leischte. Wie-n-er trotzdäm i Bsitz vo däm Kelch isch cho, het mer bishär nid chönne usefinde. Au d Frog, wi en Kelch z Zug, also imene katholische Ort, für en Pfarrer im reformierte Bärner Aargau het chönne härgschtellt wärde, isch bis jitzt es Gheimnis blibe. Überhaupt isch de Wäg vom Kelch i de letschte 350 Johr witgehend im Dunkle.
Im Früelig 2007 isch er emene Kunschthändler z Züri ufgfalle un er het sich wäge de eidütige Gravierig an d Chilegmeind Böze, wo au Effige u Elfige drzue ghöre, gwendet und en ine zum Chauf aabote. Nach emene Spändenufruf hets d Chilegmeind vermöge, de Kelch z kaufe. Sit em 2008 isch er im Bsitz vo de Chilegmeind.

Literatur[ändere | Quälltäxt bearbeite]

  • Herausgegeben von der Reformierte Kirchgemeinde Bözen: Kirche, Kelch und Kindersegen. Der arme Landpfarrer und sein goldener Kelch, Juni 2009.