Museum und Kunstsammlung Derby

Us der alemannische Wikipedia, der freie Dialäkt-Enzyklopedy
Hops zue: Navigation, Suech
S alte Museum vo Derby, jetzt isch d Zentralbibliothek dine und s Museum grad näbezue ime Neubou. S alti Huus isch vom Richard Knill Freeman.
De Neubou vo 1964.
De Alchemischt suecht de Philosophischi Stäi, vom Joseph Wright, 1771.

S Museum und Kunstsammlig Derby (uf änglisch Derby Museum and Art Gallery) isch es Museum i de mittelänglische Stadt Derby. I dem Museum isch di grööschti Sammlig vo Bilder vom Joseph Wright uf de Wält. Es hät aber au e grossi Sammlig vo Porzellan won i de Region härgstellt worden isch. Ussert dem häts i dem Museum no Abteäilige won vor alem lokali Bedüütig händ: archäologischi, historischi und militärhistorischi Exponate und e Abtäilung für Geologie und Naturgechicht.

Gschicht[ändere | Quälltäxt bearbeite]

Am 10. Februar 1836 isch s Museum uufgange. Damals häts no Stadt- und Grafschaftsmuseum vo Derby und Naturhistorischi Gsellschaft ghäisse. S isch privat gsi, d Uusstelig isch aber im öffentliche Bad a de Full Street gsi.[1] De Col. George Gawler hät sini Stäisammlig und en Huufe usgschtopfti exotischi Vögel gspänded.[2]

S Stadt- und Grafschaftsmuseum vo Derby isch 1870 ad Bürgergmäind gange. Aber wils nienet Platz gha händ, isch es erscht 1879 wider eröffnet worde.[1] D Kunschtsammlig gits sit 1882 und 1883 hät mer elektrischs Liecht instaliert. De Alfred E. Goodey hät über 50 Jaar lang Bilder gsammlet. Sini Sammlig hät er 1936 em Museum gspändet und won är 1945 gstorbe isch i sim Teschtamänt no £13,000 hinderla zums Museum z vergrössere. Mit dem Gäld isch de Neubou vo 1964 zalt worde.[3]

Sammlige[ändere | Quälltäxt bearbeite]

Kunschtsammlig[ändere | Quälltäxt bearbeite]

De Joseph Wright isch en änglische Maler im 18. Jahrhundert gsi. Är isch us Derby cho. Di wältwiit grööschti Sammlig vo Bilder won är gmaalet hät, sind i dem Museum. Es sind Portrait, Landschafte, Szene us de Literatur, de Industrie und anderi Sujets.

Ussert de Bilder vom Wright sind i de Kunschtsammlig au Bilder vom William Frederick Austin, E.E. Clark, Harold Gresley, Alfred John Keene, George Bailey, Georg Holtzendorff, David Payne, George Turner, William Wood, Ernest Townsend, George Francis Yarnell, Samuel und de Louise Rayner.[3]

Porzellansammlig[ändere | Quälltäxt bearbeite]

I de Porzellanabtäilig häts vil Gschirr us de Ziit ab 1750. S isch i de Manufaktur Royal Crown Derby gmacht worde und bi andere Härsteller us de Region. S Museum säit, d Sammlig segi wichtig und Lüüt vo de ganze Wält chömed da ane.

Historischi Sammlige[ändere | Quälltäxt bearbeite]

Di archäologische Fünd chömed fascht ali us de Region vo Derby. Di eltischte sind us de Stäiziit, di jüngschte us em Mittelalter. S Museum hät aber au zwe Mumie us Ägypte. Vo wo s gnau chömed, wäis mer nüme. Si sind 1859 oder 1860 vermuetli vo me lokale Sammler poschted worde.[4]

Di militärgeschichtlichi Abtäilig verzellt vor alem d Gschicht vo de lokale Kavallerieregimänt wie d 9th/12th Royal Lancers, d Derbyshire Yeomanry und d Sherwood Foresters.

Am Jakobiteuufstand vo 1745 händ Lüüt vo Derby mitgmacht. Da dra erinneret es rekonstruierts „Bonnie-Prince-Charlie-Zimmer“. D Original-Holzpaneele us em lokale Exeter Huus, segi „eine vo de gröschte Schetz vo de Stadt“, säits Museum. Si isch us aafangs 18. Jaarhundert.[5]

Naturhistorischi Sammlig[ändere | Quälltäxt bearbeite]

Di naturhistorischi Sammlig vom Museum zäiget Fossilie. zum Biischpil en Ichthyosaurus oder es Skelett vo me Hüppo won öppe 120 000 Jaar alt isch. Es isch 1895 z Derby gefunde worde.[6] Au di uusgschtopfti Brieftuube Chönig vo Rom („King of Rome“), won 1913 vo Rom bis uf Derby zruggfloge isch, cha mer aaluege.[7].

E paar Stück us de Uusstellig[ändere | Quälltäxt bearbeite]

Weblinks[ändere | Quälltäxt bearbeite]

 Allmänd (Commons): Derby Museum and Art Gallery – Sammlig vo witere Multimediadateie

Referänze[ändere | Quälltäxt bearbeite]

  1. 1,0 1,1 Newsletter of the Geological Curators Club, Vol 1, No. 8, 1976. Aaglueget am 26. Februar 2011.
  2. Stephen Glover: The history and directory of the borough of Derby, a guide p.430 1829
  3. 3,0 3,1 Sarah Allard, Nicola Rippon: Goodey's Derby, S. 157, Breedon Books 2003, ISBN 1 85983 379 9
  4. „World treasure - The Mummies“ – Website vom Museum mit Informatione zu de Mumie. Aaglueget am 6. Mai 2011
  5. „Architecture treasure - Exeter House Panelling“ – Website vom Museum mit Informatione zum Exeter House. Aaglueget am 6. Mai 2011
  6. „Natural History treasure - The Derby Hippopotamus“ – Website vom Museum mit Informatione zum Hüppo. Aaglueget am 6. Mai 2011
  7. „Natural History treasure - The King of Rome“ – Website vcom Museum mit Informatione zu de Brieftuube. Aaglueget am 6. Mai 2011