Mercedes-Benz O 405 N2 CNG
| Autobus | |
|---|---|
|
|
| Betriebsnummere bi de BVB | 801-812 |
| Härschteller | Mercedes-Benz |
| Buujahr | 1994-2001 |
| Achsä | 2 |
| Läischtig | 283 PS / 175 kW |
| Längi | 11865 mm |
| Breiti | 2500 mm |
| Höchi | 3250 mm |
| Radschtand | 5875 mm |
| Sitzplätz | 32, d'rvuu 1 Klappsitz |
| Stehplätz | 56 |
| Höchschtgschwindigkeit | 85 km/h |
| Läärgwicht | 11740 kg |
D'r Mercedes-Benz O 405 N2 CNG isch äs Omnibusmodäll mit Ärdgasaatriib. Diä Buukonschtrukziuu isch im 1994 entwiggled wordä. Si händ ä vollautomatisch's Füüfganggetriebe mit 'me Drehmomäntwandler, ä Zwiichräis-Druckluftbräms, ä hydrodynamische Retarder und ä Fäderspiicher-Fäderstellbräms.
Im Januar 1995 hend d' Basler Verchehrsbetrieb (BVB) ä Vorfüehrwage vu derä Buuart uf ihrä zwii lengschtä Busliniä teschtät. Als Pilotprojäkt für Liniäbüs mit Ärdgasaatriib hend's glii druf zwölf Stugg vu derä Räihä bschtellt. Jedä Wagä het uf em Dach ä-n-Ärdgasbhälter überchuu. Det d'rin het's je füüf Stahlfläsche mit 'me Fassigsvermöge vu 165 Liter gchaa. Speeter het jedä Wage zwii wiiteri Fläsche überchuu.
Im Septämber isch d'r erscht vu allne Büs in Betrieb chuu. Wäg siner bugglige Chischte uf em Dach het er de Name „Quasimodo“ überchuu. Di zwölf Büs sind bis im Auguscht 2008 im Liniäbetrieb gsi und händ ä Laufläischtig vu rund 560000 Kilometer erräicht. Mindischtens elf vu de zwölf Stugg, unter denä au d'r „Quasimodo“, sind an Mario Röttgen in Untersteinach verchauft wordä. Das isch ä Occasiunshändler für Liniä- und Räisebüs. De hät si inzwüsche wiiterverchauft.
I denä mii als zechä Jaar het das Busmodäll dank d'r guete Erfahrig z' Basel au i andärä Stedt Iizug ghalte. S' Bild näbeddranne zäigt ä buugliiche Ärdgasbus z' Mannheim. Hüt wärdet Ärdgasbüs nach em Syschtem Mercedes Benz Citaro fabriziert.
