Konrad I. von Württemberg

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Dr Konrad I. (Konrad von Wirtinisberc, C(u)onradus de Wirdeberch) isch Herr vu Wirttebärg vu 1083 bis 1110 gsii, zum erschte Mol gnännt woren isch er anne 1081.

Dr Konrad isch Suhn vun eme edelfreie Herrn vu Beutelsbach un wahrschyns e Noochuu vu dr salische Herzeg Konrad I. un Konrad II. vu Kärnte. Är isch e Brueder vum Hirsauer Abt Bruno vu Beutelsbach (1105–1120) un vu dr Liutgard vu Beutelsbach gsii. Syy Frau isch d Werntrud gsii. Är giltet as Stammvater vum Huus Wirttebärg.

Dr Konrad het um s Johr 1083 e Burg uf em Wirtebärg (Wirtebärg) bim hitige Onderdirke böue loo. Är het syy Wohnsitz dertaane verlait un het sich sälber no dr neie Burg gnännt.

Unter syym neie Name erschynt dää Konrad as Zyyg bim Bempflinger Vertrag vu dr Grofe Kuno von Wülflinge un Liutold vu Achl mit ihrem Näffe Grof Werner vu Greanenge. In däm Vertrag het s kai Datum, aber er mueß in dr Johre 1089 bis 1092 verfasst wore syy. Am 2. Mai 1092 wird dr Konrad wird z Ulm gnännt as Zyyg bi dr Ibergob vu Gieter an s Chloster Allerheilige z Schaffuuse in dr Umgebig vu dr Herzeg Berchtold un Welf. Dr Konrad I. chunnt in beede Fäll in ängem Verbund mit Aahänger vu dr Bartei vor, wu em Chaiser Heinrich IV. fyndlig gsinnt sin. Vu däre bolitische Stellig här chunnt au, dass er dr Wormser Bischof fir d Yyweiig vu dr Burgkapäll chuu losst statt em Konstanzer Bischof, wu fie dr Kapäll vum Biet här aigetli zueständig gsii wär, wel dr Wormser Bischof au ne Fynd vum Chaiser gsii isch.

Scho friejer, villicht in dr Johre 1080 bis 1087, isch dr Konrad noch em Hirsauer Schänkigsbuech bi re Vergob vu syym Brueder Bruno vu Hirsau derbyy gsii. Är un au syy Frau hän sich em Chloschter gnaigt zaigt, in däm Buech wird er e „mächtige Mann unter dr Schwobe“ gnännt.

Literatur[ändere | Quälltäxt bearbeite]

  • Dieter Mertens in: Sönke Lorenz, Dieter Mertens, Volker Press (Hrsg.): Das Haus Württemberg. Ein biographisches Lexikon. Kohlhammer, Stuttgart 1997, ISBN 3-17-013605-4, S. 8



Dä Artikel basiert uff ere fräie Übersetzig vu dere Version vum Artikel „Konrad_I._(Württemberg)“ vu de dütsche Wikipedia.

E Liste vu de Autore un Versione isch do z finde.